عراق راگەینێد پویچەڵکردن پیلانەیلیگ وە ئامانجکردن ناوچەی خەزڕا
2020-12-24T10:24:12+00:00
شەفەق نیوز/ عوسمان غانمی وەزیر ناوخۆی عراق، ئمڕوو پەنجشەممە، راگەیان پویچەڵکردن چەن پیلانیگ ئەرا ئامانجکردن ناوچەی خەزڕا لە بەغداد، ک بارەگایل شاندە دبلۆماسیە بیگانەگان و شوونەیلیگ حکومەتی هاناوی.
ناوچەی خەزڕا، و دەورگرد باڵیۆزخانەی ئەمەریکا، کەفتە وەر پەلامارەیلیگ لە شوون یەک، ک پەلامارەگەی رووژ یەکشەممەی گوزەیشتە سەختترینیان بوی.
دۆناڵد تڕامپ سەرۆک ئەمریکا، دوێەکە چوارشەممە، توومەتبار ئیران کرد ک هالە پشت ئەو بمبارانە.
لەی باوەتە، عوسمان غانمی وەزیر ناوخۆ ئەرا تەلەفزیۆن عەرەبیە دووپاتکرد ک کار ئەرا مقەیەتیکردن شاندە دبلۆماسیەگان لە بەغداد کەیمن، و هەمیش پلانیگ ئەمنی سەربازی ئەرا نواگردن پەلامارەیل ناوچەی خەزڕا جیوەجی کەیمن.
هەمیش راگەیان دەسگیرکردن یەکیگ لەوانەگ مووشەک وەرەو باڵیۆزخانەی ئەمەریکا وەشنێد.
