عراق دووارە کەفێدە وەردەم وڵاتەیل جەهان وە پلەی گەرمی

شەفەق نیوز/ شارەیل عراق گلەو خوارد ئەرا ناو لیست پلەی گەرما، ئمڕوو دووشەممە، کە هاتە بان لە بەرزەوبوین پلەی گەرمی لە جەهان لە ماوەی ٢٤ ساعەت گوزەشتە.

 وێستگەی پلاسەرڤیل لە ویلایەت کالیفۆرنیای ئەمریکا خشتەی ١٥ ناوچە و شار جەهانی بڵاو کرد کە بەرزترین پلەی گەرمی لە جەهان توومار کردنە لە ماوەی ٢٤ ساعەت گوزەشتە.

 لەو خشتە دەرکەفت کە شار عمارە کە ناوەند پارێزگای میسانە لە عراق بەرزترین پلەی گەرمی لە جەهان توومارکرد کە ٤٧.٢ پلەی سەدی بویە، لە دویای ئەویش شار ناسریە کە ناوەند پارێزگای زیقار عراقە وە ٤٧.٢ پلە، و گەڕەک ئەلحوسێن لە شار بەسرە، هاتە پلەی سێیەم وە پلەی گەرمی 46.8، و شار کوت کە ناوەند پارێزگاری واسیت عراقە وە پلەی گەرمی 46.4 هاتە پلەی چوارەم  و فڕۆکەخانەی ناودەوڵەتی کوێت لە کوێت کەفتە پلەی پەنجەم وە پلەی گەرمی 46.4 پلەی سەدی.

 وەگورەی خشتەگە، شار رفاعی لە پارێزگای زیقار عراق وە پلەی گەرمی 46.4 پله پلەی شەشەم بویە بەشی، ئیجا شار بەدرە له پارێزگای واسیت عراق وە پلەی گەرمی 46.1 پله کەفتە پلەی هەفتەم، ئیجا فڕۆکەخانەی ناودەوڵەتی بەسرە لە عراق لە پلەی هەشتەم وە پلەی گەرمی 46.1 پلەی سەدی، شار ئامادییە لە ئیران وە 46. 1 پلەی سەدی کەفتە پلەی نۆهەم، ئیجا شار سەماوە کە ناوەند پارێزگای موسەنای عراقە هاتە پلەی دەهەم وە پلەی گەرمی 46.1 پلەی سەدی.

 شار عەزیزیە لە پارێزگای واسیت عراق کەفتە پلەی ١١ وە پلەی گەرمی ٤٦ سەدی، ئیجا ناوچەی فاو لە عراق لە پلەی دوازهەم وە پلەی گەرمی ٤٥.٩ سەدی، قەزای حەی لە پارێزگای واست عراق لە پلەی ١٣ وە پلەی گەرمی ٤٥.٩ سەدی، و شار ئابادان لە ئیران لە پلەی ١٤ وە پلەی گەرمی ٤٥.٨ پلەی سەدی، لە کۆتایی فڕۆکەخانەی ناودەوڵەتی نەجەف لە عراق کەفتە پلەی ١٥ وە پلەی گەرمی ٤٥.٨ پلەی سەدی.

 جی باسە کە هەفتەی گوزەشە عراق لیست گەرمترین شارەیل جەهان دەرچگ.