عراق دەسکەێدە هەڵمەتیگ لە فەرمانبەرکردن بیکار و دەرچگەیل
شەفەق نیوز/ ئەنجومەن وەزیران، ئمڕوو دووشەممە، دەسکردە هەڵمەتیگ ئەرا فەرمانبەرکردن دەرچگەیل و بیکاریەگان لە وڵاتەگە.
ئەحمەد مەڵا تەڵال، قسەکەر وەناو سەرۆک وەزیران، لە کۆنگرەی هاوبەشیگ وەگەرد وەزیر کار و باوەتە کۆمەڵایەتیەگان، و پەیامنێر ئاژانس شەفەق نیوز ئامادەی بوی وت: ئەرا چەن هەفتەیگە ئەنجومەن وەزیران کارکەێد لەبان گورجکردن ئەنجومەن خزمەتگوزاری فیدرالی، ئەرا دابینکردن کار ئەرا گەنجە بیکارەگان و دەرچکەیل، و ئاماژەکرد ک لەڕی ماڵپەڕەیل ئەلیکتڕۆنی ئەنجومەنەگە وە گامەیل ئاسانیگ داواکاریەگە خریەێدە وەردەس.
لەلای خوەییش وەزیر کار و باوەتە کۆمەڵایەتیەگان وت: وەزارەتەگەی وەرپرسایەتی یاسایی دیرێد ئەرا فەرمانبەرکردن گەنجەیل وەتایبەت ک پەتای کۆڕونا رێژەی بیکاری لە وڵاتەگە بەرزەو کرد و هەمیش رێژەی هەژاری.
وتیش؛ یەک مەلیۆن و ٦٠٠ هەزار بیکار لە وەزارەت کار و باوەتە کۆمەڵایەتیەگان تۆمار کریانە، و ئاماژەکرد ک ئەنجومەن خزمەتگوزاری فیدڕاڵی ئەوەسا بوودە خاوەن ئەرکیگ لە ماوەی ئایندە ئەرا دابینکردن دەرفەتەیل کار، وەتایبەت ک ئەیە لەداواکاریەیل خۆپیشاندەرەگانە ئەرا فەرمانبەرکردن لە کەرت گشتی.
وتیش؛ ٨ هەزار دەرچگ هەس لە خاوەن بڕوانامەیل ماستەر لە بیکارەگان لە وەزارەتەگە تۆمار کریانە، هەمیش دوو هەزار دەرچگ لە خاوەن بڕوانامەیل دکتۆرا هەمیش بیکارن و لە وەزارەتەگە تۆمار کریانە.
