عراق دەسکەێدە دروسکردن دیوار کۆنکریتی ١٠٠ کیلۆمەتری لەبان سنوور سوریا

شەفەق نیوز/ وەزارەت ناوخۆی عراق، ئمڕوو چوارشەممە، دەسکردن وە پڕۆژەیگ راگەیان ئەرا دروسکردن تەیمانەیگ کۆنکریتی وە درویژی ١٠٠ کم لەبان سنووری وەرد سوریا،  جویر بەشیگ لە ریکارەیل ئەمنی ئەرا قایمکردن سنوور ناوەین دوو وڵات.

لە ساڵەیل گوزەشتە، حکومەت عراق چەن ریکاریگ جیوەجی کرد ئەرا قایمکردن سنووری وەرد سوریا، لەلییان داناین کامیرایل گەرمی، و هەڵکەنین سەنگەر، و دروسکردن دیوار کۆنکریتی ئەرا نواگردن دزەکردن تیرۆریستەیل.

وەزارەتەگە لە بەیاننامەیگ رووژنامەوانی وت: دەسکردە پڕۆژەی قایمکردن سنوورەگە جویر بەشیگ گرنگ لە کارەیل مقیەتیکردن، وە دروسکردن ١٠٠ کم دیوار کۆنکریتی لە باکوور و باشوور چەم فورات لە ناوچەی تریفاوی خوەرئاوای پارێزگای ئەنبار.