عراق ئاشكراى گرتنه‌وه‌ر رێ وشوون تايبه‌ت كرد له‌ سه‌رده‌م كۆرۆنا

عراق ئاشكراى گرتنه‌وه‌ر رێ وشوون تايبه‌ت كرد له‌ سه‌رده‌م كۆرۆنا
2020-04-07T10:39:55+00:00

شه‌فه‌ق نيوز/ ليژنه‌ى باڵاى ته‌ندروستى و سه‌ڵامه‌تى نيشتمانى عراقى، ئاشكراى گرتنه‌وه‌ر رێ و شوونه‌يليگ كرد له‌وه‌ر هاوكارى وه‌ قوربانيه‌يل ڤايرۆس كۆرۆنا و رۆڵ كادره‌يل پزيشكى و ئه‌منى له‌ ماوه‌ى قه‌يران ئيسه‌ى ته‌ندروستى.

 

ليژنه‌گه‌ له‌ به‌ياننامه‌يگ وت: له‌وه‌ر هاوكارى وه‌ل خيزانه‌يل ئه‌و كه‌سه‌يله‌ ك گيان له‌ده‌سدان و ئه‌وانه‌گ تويشهاتنه‌ وه‌ ڤايرۆس كۆرۆنا و له‌وه‌ر رۆڵ باڵاى كادره‌يل پزيشكى و په‌رستيارى له‌ وه‌زاره‌ت ته‌ندروستى و به‌ڕێوه‌به‌رايه‌تيه‌يلى له‌ پاريزگايه‌يل و له‌وه‌ر پشگيرى له‌ هه‌ڵويست هيزه‌يل چه‌كدار و ده‌زگايه‌يل ئه‌منى و له‌وه‌ر ده‌سپيشخه‌ره‌يل ده‌سميه‌ته‌يل كۆمه‌ڵايه‌تى له‌ناونى عراقيه‌يل ك مانايه‌يل ئنسانى و يه‌كگرتگى نيشتمانى وه‌ جوانترين شيوه‌يگ به‌رزه‌و كرد و له‌وه‌ر جيوه‌جيكردن بڕياره‌يل ليژنه‌ى باڵاى ته‌ندروستى و سه‌ڵامه‌تى نيشتمانى ئه‌را ريگرى له‌ بڵاوبوينه‌وه‌ى په‌تاى كۆرۆنا له‌ دانيشتن دويه‌مى وه‌ سه‌رۆكايه‌تى عادل عه‌بدولمه‌هدى سه‌رۆك وه‌زيره‌يل كار وه‌رێخه‌ر، بريار دريا:

1- په‌خشكردن سرود نيشتمانى عراقى له‌گشت هووكاره‌يل ره‌سانن عراقى(له‌ يه‌ك وه‌خت/ سه‌عات 9 ئيواره‌ى ئمڕوو)و له‌گشت عراق، وه‌ل كوتان زه‌نگ ئاگاداركردنه‌وه‌و بانگه‌واز له‌لايه‌ن ده‌زگايه‌يل وه‌ڕيه‌وبه‌رايه‌تى وه‌رگرى شارستانى له‌ هه‌مان وه‌خت.

2- وسيان ئه‌را گيان قوربانيه‌يل له‌ عراق و ده‌وڵه‌ته‌يل عه‌ره‌بى و ئسلامى و جه‌هان وه‌گشتى وه‌ل خوه‌نين سوره‌ى فاتحه‌ و دوعاكردن خاسه‌وبوين ئه‌را تويشهاتگه‌يل و وه‌و خاتريشه‌ مزگفت و حسه‌ينيه‌و كه‌نيسه‌يل و ماڵه‌يل خوداپه‌رسى ئازادى ته‌واويگ داشتوون وه‌و جووره‌گ دويننه‌ى ك گونجياگه‌ ئه‌را وه‌كارهاوردن به‌ڵه‌نگوو و هووكاره‌يل تر بانگه‌واز.

3- گشت هووكاره‌يل ره‌سانن عراقى و ماڵپه‌ڕه‌يل په‌يوه‌ندى كۆمه‌ڵايه‌تى و رووژنامه‌نويسه‌يل و نويسه‌ره‌يل و ريكخرياگه‌يل كۆمه‌ڵگاى مه‌ده‌نى رۆڵ سه‌ره‌كى ديرن له‌ هه‌وڵ جياى نيشتمانى وه‌ رويماڵكردن و پشتگيرى ئى وسيان نيشتمانى هاوكاريه‌ وه‌و شيوه‌گ هه‌ڵويست عراق و يه‌كێتى هسيارى عراقيه‌يل و ئازايه‌تى و يه‌كگرتن و پشتگيرييان ده‌ربخه‌ێد ئه‌را گشت به‌شداربويه‌يل له‌ روێ وه‌ڕوێ بوينه‌وه‌ى په‌تاگه‌، له‌وانه‌يش هه‌وڵ وه‌زاره‌ته‌يل و ده‌زگايه‌يل خزمه‌گوزارى و دام و ده‌زگايه‌يل تر ك وه‌رده‌وامن له‌ كاره‌يليان وه‌ گووره‌ى تايبه‌تمه‌ندييان.

4-  حكومه‌ت جه‌خت له‌وه‌ ئه‌كاده‌وه‌ ك گرنگى تايبه‌ت ئه‌ياده‌ چاره‌سه‌ر شوونه‌واره‌يل ئابوورى قه‌يه‌غه‌ى هاتوچوو و زه‌ره‌دمه‌نه‌يل له‌لى، له‌وانه‌يش ئه‌و خيزانه‌يله‌ ك كه‌مده‌رامه‌تن و رووژانه‌ كاره‌يل و دابينكردن مادده‌يل خوه‌راك و سه‌قامگيركردن نرخه‌يل و هه‌ر له‌وه‌ر ئه‌وه‌يش ليژنه‌يليگ دامه‌زرانگه‌.

Shafaq Live
Shafaq Live