ئەعەرەجی و بلاسخارت باس گرنگی کۆتاییهاوردن وە باوەت کەمپ هۆل کەن

نویسینگەی ڕاگەیانن ڕاویژکار ئاسایش نیشتمانی، لە بەیاننامەیگ رەسیە ئاژانس شەفەق نیوز وت:  گردەوبوینەگە وە سەرۆکایەتی راویژکار ئاسایش نیشتمانی، قاسم ئەعەرەجی، وە بەشداری سەرۆک دەزگای ئاسایش نیشتمانی، حەمید شەتری  جیگر فەرماندەی ئۆپەراسیۆنە هاوبەشەیل، لیوا قەیس محمداوی، جیگر وەڕێوەبەر وەڕێوەبەرایەتی هەواڵگری و لێکۆڵینەوەی فیدراڵی،  کەسایەتیەیل ئەکادیمی و وەرپرسەیل وەزارەت دەرەوەی عراق، وە ئامادەبوین نوێنەر ئەمیندار گشتی نەتەوە یەکگرتگەیل لە عراق، جینین بلاسخارت و باڵیۆز یەکێتی ئەوروپا و وڵاتەیلیگ عەرەبی و بیانس ک لە عراق کار کەن.

وتیش: ئەعەرەجی دەسکردە گردەوبوینەگە وە وتاریگ ک لەناوی وت: حکومەت عراق چەن جاریگ ئاشکرا کردیە  ک ئۆردوگای هۆل لە سوریا هەڕەشە و مەترسییە لەبان عراق و جەهان و بایەتە پویچەڵ بکریەێد، و زوور لە  "گرنگی یەکگردن کۆمەڵگەی ناودەوڵەتی کرد، و کارکردن ئەرا گاڵداین وڵاتەیل تا هاووڵاتییان لە کەمپەگە بوەنەو، و پێشنیار کرد  کۆنفرانسیگ ناودەوڵەتی لەبان ئاست وەزیرەیل کاروبار دەیشت وەڕیەو بچوود، ئەرا پەیاکردن چارەسەریگ ئەرا بەسانن ئی کەمپە، وتیش: حکومەت عراق 1369 خیزان لەی کەمپەو هاوردە عراق و خستەیانە ژیر  ئامادەکردن ئەرا تێکەڵبوینیان وەگەرد کۆمەڵگا، وتیش: 800 خیزان دویای ئەوە ئەرا ناوچەیل خوەیان گلەو خواردن.

 ئەعەرەجی لە ناو وتارەگەی وتیش؛  هەبوین مناڵەیل لەناو کەمپیگ ک خوسە و قین و تاوانکاری لەناوی بڵاو بویە، نەوەی نوویگ تیرۆریست دروس کەێد،  و ئی مناڵەیلە قوربانین، و تیرۆریستەیلیش بایەتە وەپەی یاسا پرسیار وەگەردیان بکریەێد، و لە سزا مەرەقەز نەوون.

ئەعەرەجی هەمیش وت: پرس کەمپ هۆل سوریا ناوخوەیی نییە، عراقیش رەسانیەسەی پرس کۆمەڵگەی ناودەوڵەتی، و داواکاری عراق ئەرا گلەوداین وڵاتەیل ئەرا هاووڵاتیەیل خوەیان لە کەمپەگە رەسنێد.

جینین پلاسخارت، نوێنەر ئەمیندار گشتی نەتەوە یەکگرتگەیل لە عراق، نووڕین نەتەوە یەکگرتگەیل لەباوەت کەمپ هۆل نشان دا، ک وت: ئەوەگ تیرۆر داعش وەجی هیشتیە میراتییگ ئاڵووزە و بایەسە گشتمان ڕوووەڕویی بویمن، و باس گرنگی کلکردن مناڵەیل لە کەمپەگە کرد وەرجە ئەوەگ بڕەسنە تەمەنیگ و بوونە تیرۆریست، وتیش: تەقەلایل عراق لەی باوەتە کەم نەوین، وتیش: خاسترین چارەسەر ئەرا بەسیان ئی فایلە تەقەلایل هاوبەش کۆمەڵگەی ناودەوڵەتیە ئەرا کۆنترۆڵکردن و چارەسەرکردن ئی رەوشە.