عەتەبەی کازمێن بەشداریکردن زیاتر لە ١٤ ملیۆن زیارەتکەر لە زیارەت رەجەبی راگەینێد
شەفەق نیوز/ عەتەبەی کازمێن، ئمڕوو یەکشەممە، بەشداریکردن ١٤ ملیۆن کەس لە زیارەت رەجەبی راگەیان، و فەرماندەیی ئۆپراسیۆنەیل بەغداد دووپات لە سەرکەفتن پلان ئەمنی زیارەتەگە کرد.
ئەمیندارێتی گشتی عەتەبەی کازمێن لە بەیاننامەیگ رەسیە ئاژانس شەفەق نیوز وت: حەیدەر حەسەن شمەری ئەمیندار گشتی عەتەبە راگەیان کە شمارەی زیارەتکەرەیل ئەرا یاد شەهیدبوین ئیمام کازم رەسیە زیاتر لە ١٤ ملیۆن کەس.
ئمڕوو، کۆتایی وە زیارە ساڵیاد مردن ئیمام کازم بوی، دویای ریکردن وەپا وەلایەن ملیۆنا زیارەتکەر ئەرا شار کازمیە، لە جویراجویر ناوچەیل بەغداد و عراق.
هەرلیوا، فەریق روکن وەلید خەلیفە تمیمی فەرماندەی ئۆپراسیۆنەیل بەغدا لە بەیاننامەیگ رەسیە ئاژانس شەفەق نیوز وت: دەزگایل ئەمنی وەماوەی رووژەیل وەردەوامیگ وە تەقەلای هەواڵگری گەورە، توەنستن مقیەتیکردن ئەو بڕەیل ملیۆنیە جیوەجی بکەن، کە هاتن ئەرا ساڵیادەگە لە شار کازمیە، هەمیش ئارامکردن گشت ئەو قسەیلە لە گشت ناوچەیل پایتەخت کە زیارەتکەرەیل وەپیانەو هاتن.
وتیش؛ ئەندامەیل هیزەیل ئەمنی لە وەزارەت وەرگری و ناوخۆ و دەزگای حەشد شەعبی و دەزگا و ئاژانسەیل هەواڵگری، رەنج گەورەیگ دانە کە شایستەی ئافەرینە.
لەلای خوەییش، ئەمیندارێتی کازمێن دووپات لە سەرکەفتن پلان زیارەت رەجەبی کرد، باس هەڵگردن ٤ هەزار تەن گەناڵخە لە شار کازمیە کرد.
ئیمام موسای کازم، هەفتەم ئیمامەیل شیعەی دوانزەییە، لە ٢٥ رەجەب ١٨٣ی کووچی لەناو زیندان هارون رەشید لە بەغداد گیانی لەدەسدا، کە فرەی ساڵەیل دویایینی لەناو زیندانەیل وەسەربرد.
زیارەت ساڵانە ئەرا مەزارگەی ئیمام کازم، دیارترین بوونەیل ئاینیە لە عراق، کە شیعەیەیل لە جویراجویر شوینەیل جەهان تیەنە زیارەتی.
