کەشوهەوای عراق لە دویاترین هەفتەی ئی مانگە
2023-11-26T08:01:14+00:00
شەفەق نیوز/ دەسەی کەشناسی عراق، ئمڕوو یەکشەممە، کەشوهەوای وڵاتەگە ئەرا ئی رووژەیل بانانە بڵاو کرد، و باس واران و ئەوروتریشقە و داوەزیان پلەی گەرمی کرد.
دەسەگە لە بەیاننامەیگ رەسیە ئاژانس شەفەق نیوز وت: کەشوهەوای سوو دووشەممە، ئاسمان رووشنە تا نیمچە ئەورە وەگەرد دەرفەتیگ ئەرا نمە وارانیگ، و پلەی گەرمی چەن پلەیگ نزمەو بوود.
وتیش: رووژ سێشەممە، ئاسمان رووشنە وەگەرد لەکە ئەوریگ لە گشت وڵاتەگە، و پلەی گەرمی کەمیگ نزمترەو بوود.
دیاری کرد کە رووژ چوارشەممە، لە گشت ناوچەیل وڵاتەگە رووشنە تا نیمچە ئەورە، و پلەی گەرمی کەمیگ بەرزەو بوود.
دەسەگە وتیش: کەشوهەوای وڵاتەگە ئەرا رووژ پەنجشەممەی ئایندە، نیمچە ئەورە، و پلەی گەرمی لە گشت وڵاتەگە کەمیگ بەرزەو بوود.
