کەشوهەوای عراق.. تەپوتووز بەرزەوبوود پلەی گەرمی رەسێدە خوار پەنجاگان (نەخشە)

شەفەق نيوز- بەغداد 

دەسەی کەشناسی عراق، ئمڕوو پەنجشەممە، مەزەنەیل کەشوهەوای  رووژەیل بانان گشت وڵاتەگە راگەیان، مەزەنەی بەررەوبوین تەپوتوز و بەرزەوبوین کەمکەمیگ پلەی گەرمی کەێد باوجینیەرەسێد وە پەنجاگان.

دەسەی کەشناسی لە بەیاننامەیگ رەسیە ئاژانس شەفەق نیوز وت، ئمڕوو پەنجشەممە وڵاتەگە کەفێدە وەر کاریگەری داوەزیانیگ پلەیگەرمیوەرزی  وە بارستە وای هشکیگ، کە هیلێد کەشەگە گرم تا گەرم تونیگ  بوود و وەشیوەی گشتی جیگیرە، وەرد ئاسمان پاکیگ و لەباکوور وڵاتهەورەیل جیایجیا دەرکەفن، وتیش پلەی گەرمی نزیک توومارەیل دویکە مینێد، وەرد داوزیان کەمیگ لە بڕیگ ناوچە.

دیاریکرد "کەشوهەوای سوو جومعە، ئاسمان ساماڵە وەرد لەکە ئەور لە ناوچەیل باکوور، و پلەی گەرمی نزیکە لە رووژ گوزەشتە".

وەپای بەیانامەگە بەرزترین پلەی گەرمی مەزەنەکریاگ ئەرا رووژ سوو جومعە وەیجویرس: بەغدا، کەرکوک، نەینەوا، سەڵاحەدین، دیالە:45 پلە، دهۆک و ئەنبار:42 پلە، سلێمانی و هەولێر :43 پلە، کەربەلا وبابل :46 پلە، دیوانیە و واست و نەجەف: 47 پلە و میسان و زیقار و موسەنا:48 پلە و بەسرە :49 پلە.

وتیش، کەش سوو شەممە ساماڵە وەرد بڕیگ ئەور جیاواز، و پلەی گەرمی نزیک رووژ جومعە مینێد" وتیش "کەش یەکشەممە وە گشتی ساماڵە وەرد دروسبوین بڕیگ ئەور لە ناوچەیل باشوور لەدویای نیمەڕووە، و وای باکوور خوەرئاوای سووک تا مامناوەیگ و گاجاریگی گورجەوبوود ئەرا  30 كم/س، بوودە مدوو بەرزەوبوین تەپووتوز، و پلەی گەرمی کەمیگ بەرزەوبوود".

 وتیش "ئاست نوڕین رووژ یەکشەممە هاناوەین  6 تا 8 كم، لە وەخت تەپوتوز رەسێدە  2-4 کم".

لەباوەت کەش دووشەممە، دەسەگە دیاریکرد، ساماڵە وەگەردیا وای باکوور خوەرئاوا وەردەوامە لە چالاکی بوودە مدوو تەپووتوز، و پلەی گەرمی نزیکە لە رووژ گوزەشتە، ئاست نوورین ئاسۆیی ها ناوەین  6-8 كم، گاجاریگ ئرا  2-4 كم داوەزێد.

ئاژانس شەفەق نیوز خشتە و نەخشەی رووشنکردن پلەی گەرمی بەرزەرین نزمترین و ئاڵشتکاریەیل کەش بڵاوکەێد، وەپای ئەوەگ دەسەی کەشناسی بڵاویکردیە.