کەشناسی عراق لەی رووژەیلە.. گەرمی وەردەوامە لە بەرزەوبوین
2023-07-13T07:59:59+00:00
شەفەق نیوز/ دەسەی کەشناسی عراق، ئمڕوو پەنجشەممە، مەزەنەی کەشوهەوای وڵاتەگە لەی چوار رووژ بانانە بڵاو کرد، و باس وەردەوامی لە بەرزەوبوین پلەی گەرمی کرد.
دەسەگە لە بەیاننامەیگ رەسیە ئاژانس شەفەق نیوز وت: کەشوهەوای سوو جمعە لە گشت ناوچەیل وڵاتەگە رووشن و گەرمە، و و پلەی گەرمی لە بەشەیل ناوڕاس کەمیگ بەرزەو بوود، و لە باکوور نزیک رووژ وەرجە خوەیە، و لە ناوچەی باشوور چەن پلەیگ بەرزەو بوود.
وتیش: لە رووژەیل شەممە و یەکشەممە، پلەی گەرمی لە گشت ناوچەیل وڵاتەگە نزیک رووژ وەرجە خوەیە.
دەسەگە وتیش؛ کەشوهەوای وڵاتەگە لە رووژ دووشەممەی ئایندە، لە ناوچەی ناوڕاس و باکوور نزیک رووژ وەرجە خوەیە، و لە ناوچەی باشوور کەمیگ بەرزەو بوود.
