کەشناسی عراق..خوەڵوتووز نوویگ وڵاتەگە گرێدەو

کەشناسی عراق..خوەڵوتووز نوویگ وڵاتەگە گرێدەو
2023-05-29T08:20:48+00:00
شەفەق نیوز/ دەسەی کەشناسی عراق، ئمڕوو دووشەممە، مەزەنەی کەشوهەوای وڵاتەگە لەی هەفتە راگەیان، و باش هەڵسان خوەڵوتووز لەی دوو رووژە کرد. 

دەسەگە لە بەیاننامەیگ رەسیە ئاژانس شەفەق نیوز وت: کەشوهەوای سوو سێشەممە، لە ناوچەی ناوڕاس نیمچە ئەورە و جاروباریش ئەور تەواو و خوەڵوتووز سووکیگ وەگەرد نمە وارانیگ لە بەشەیل خوەرئاوای، و لە ناوچەی باکوور ئەورە وەگەرد نمە وارانیگ لە بەشەیل خوەرئاوای، و لە ناوچەی باشوور نیمچە ئەورە جاروباریش ئەور تەواوە وەگەرد خوەڵوتووز سووکیگ و دەرفەت نمە وارانیگ وە شەو، و پلەی گەرمی لە گشت وڵاتەگە نزیک رووژ وەرجە خوەیە.

 وتیش: رووژ چوارشەممە، لە ناوچەی ناوڕاس و باشوور رووشنە تا نیمچە ئەورە، و لە ناوچەی باکوور نیمچە ئەورە تا ئەور تەواویج وەگەرد نمە وارانیگ مەوقەی رووژ، و پلەی گەرمی لە گشت وڵاتەگە نزیک رووژ وەرجە خوەیە.

دیاری کرد ک رووژ پەنجشەممە، رووشنە وەگەرد لەکە ئەوریگ، و پلەی گەرمی لە گشت وڵاتەگە نزیک رووژ وەرجە خوەیە.

بەیاننامەگە وتیش؛ کەشوهەوای رووژ جمعەی ئایندە رووشنە وەگەرد لەکە ئەوریگ لە گشت ناوچەیل وڵاتەگە، و پلەی گەرمی لە بەشەیل ناوڕاس و باشوور نزیک رووژ وەرجە خوەیە، و بە بەش باکوور کەمیگ بەرزەو بوود.

 

Shafaq Live
Shafaq Live