کەشناسی ئەرا عراقیەیل: دڵنگەیل زمساندان ئامادەبکەن
شەفەق نیوز/ دەسەی کەشناسی و زەویلەرزەناسی عراق، شەوەکی ئمڕوو چوارشەممە راگەیان کۆتایهاتن وە ئەوکەشوهەوا واراناویە کە مەوەی دوو رووژە ناوچە جیاوازەیل وەخویان دویین وەرەو کۆتایی چێد و کاریگەری لەبان ناوچەیل ترەک دروس نیەکەێد لەوەر داوەزیان جەمسەریەیلە وە هشکی و کەمی چام جیاوەکرێد.
دەسەگە لە بەیاناامەیگ رەسیە ئاژانس شەفەق نیوز راگەیان، ئمڕوو کاریگەریەگە مینێد ئەوریگ گرێدە خوەی لە ئاسمان شارەیل باشوور و باکوور عراق، وەرد دەرفەت واران وارین سوکیگ یا پرزە لە بەسڕە و میسان وەرجە نیمەڕوو کۆتایی تێد.
هەمیش مەزەنە کەێد واران سوکیگ لە سلێمانی و هەولێرو دهۆک بوارێد، وەرد وەفر وارین لە کویەیل بەرز.
دەسەگە مەزەنەکەێد، لە شەو و شەوەکی سوو شەپوولیگ تەم دروسبوود لە ناوچەیل باکوور عراق، بوودە هووکار کەمەوبوین نوڕین ئاسۆیی ئەرا 1کیلومەتروەرد تەم سوکیگ تا ناوڕاسیگ لە شارەیل ترەک.
دیاریکرد لە رووژەیل بانان کەشوهەوای زمسانەی جیگیریگە وەرد داوەزیان فرەیگ پلەی گەرمی، وە تایوەت لە وەخت شەوەکی وتیش؛ ناوچەیل باکوور خوەرهەڵات وڵاتەگە و خوەرئاوای ئەنبار لە شەوەکیان پلەی گەرمی ژیر سفر توومارکەن.
وە وەرچەو گردن سەردی قایمیگ، دەسەگە داوا لە هاوڵاتیەیل کەێد دڵنگ زمسان بپوشن ئەرا کەمەوکردن کاریگەری نەرێنی تەندروسیەیل کەشوهەوای سەرد.
