گەشناسی.. داوەزین گەرمی و خوەڵوتوز لە بەغداد وچەن پارێزگایگ
شەفەق نیوز/ شارەزای کەشناسی سادق عەتیە، ئمڕوو شەممە، مەزەنەی هەڵسیان خوەڵوتوزیگ ناوڕاسی لە بەغداد وچەن پارێزگایگ ئەرا شەو یەکشەممە و شەوەکی دووشەممە کرد، وهەمیش باس داوەزین پلەی گەرمی لە سێ رووژ بانان کرد، وتەمەی ئەوە کرد ک شەو یەکشەممە وشەوەکی دووشەممە گەشت دەیشتی نەکەن چوینکە خوەڵوتوزەگە بنگرێد.
عەتیە لە پۆستیگ لەبان فەیسبووک وئاژانس شەفەق نیوز نووڕیەی وت: خوەڵوتوزیگ ناوڕاسی وەکاریگەری واگە لە بەغداد پایتەخت وسەڵاحەدین و ناوبەین زیقار و بەسرە و واست وناوچەیلیگ لە باشوور نەینەوا وفورات ناوڕاس هەڵسێد.
عەتیە وتیش: مەزەنەیل بانان نشان داوەزین پلەی گەرمی ئەرا رووژەیل لە یەکشەممە تا سێشەممە دەن، لەوەر هاتن پارچە وای هوونکیگ، ودیاری کرد ک داوەزینەگە لە شارەیل ناوڕاس و خوەرئاوا و باکوور وڵاتەگە ئاشکراس.
عەتیە وتیش: لە رووژ چوارشەممە دووارە پلەی گەرمی بەرزەو بوود، وئەور ناوڕاس وبەرزیگ لە ئاسمان شارەیل باشوور لە رووژ دووشەممە دیار دەێد.
عەتیە مەزەنە کرد ئمشەو خوەڵوتوز ناوڕاسییگ لە باشوور نەینەوا، واست، میسان، خوەرئاوای بەسرە، خوەرئاوای زیقار بەرزەو بوود، و تووزەگە ئەرا شەوەکی رووژ یەکشەممە لە باشوور نەینەوا روی وەرەو سەڵاحەدین ئیجا بەغداد پایتەخت بکەێد.
شارەزای کەشناسیەگە وتیش: خوەڵوتوز لە ماوەیل رووژ یەکشەممە وەردەوام بوود، و خەسیەگەی ئەرا شەو یەکشەممە/ دووشەممە وشەوەکی دووشەممە لە ناوچەیل نەینەوا و سەڵاحەدین و ئەنبار و دیالە و واست وبغداد و شارەیل باشوور و فورات ناوڕاس خەسەو بوود.
