شانه‌ى قه‌يران وشدارى دا له كه‌فتنه‌وه‌ى كاره‌سات له به‌غدا
شه‌فه‌ق نيوز/ حه‌سه‌ن كه‌ريم كه‌عبى سه‌رۆك ليژنه‌ى قه‌يران نوێنه‌رايه‌تى ، ئاماره‌يل تويشبوين و تۆماركرياێ دويه‌كه‌ى سێشه‌ممه وه ڤايرۆس كۆرۆنا و به‌رزه‌وبوينى ئه‌را 71 حاڵه‌ت، وه زه‌نگ فريه مه‌ترسيدار تاريف كرد وه ئه‌وه‌گ كاره‌سات ئنسانى و ته‌ندروستى له عراق له‌لى ئه‌كه‌فێده‌و.
كه‌عبى له به‌ياننامه‌يگ ئه‌را ئاژانس شه‌فه‌ق نيوز وت: هووكار بنه‌ڕه‌تى و راسه‌وخۆ له پشت به‌رزه‌وبوين شماره‌ى تۆماركرياێ وه ڤايرۆسه‌گه ئه‌چێده‌و ئه‌را پابه‌ند نه‌وين وه رێ وشوونه‌يل قه‌يه‌غه‌ى هاتوچوو چ گشتى يا نيمچه‌يى و ده‌رچگن شماره‌ى فريه‌ى هاووڵاتيه‌يل ئه‌را ده‌يشت و بازاڕه‌يل وه‌بى گووشداين وه مه‌ترسى ئى په‌تاو پابه‌ند نه‌وين وه رينمايه‌يل ته‌ندروستى و خوه‌يپاريزى.
جى باسه، كه‌عبى داوايش له لايه‌نه‌يل په‌يوه‌نديدار كرد موحاسبه‌ى سه‌رپيچيكاره‌يل بكه‌ن له‌وانه‌گ سه‌رپيچى له قه‌يه‌غه‌ى هاتوچوو ئه‌كه‌ن و هه‌وڵه‌يليان زياتر بكه‌ن له‌ى باوه‌ته‌و.
جى باسه، دويه‌كه سێشه‌ممه وه‌زاره‌ت ته‌ندروستى ئاشكراى تۆماركردن دو حاڵه‌ت مردن و 95 حاڵه‌ت تويشبوين كرد وه ڤايرۆس كۆرۆناى تازه له وڵاته‌گه له ماوه‌ى 24 سه‌عات گوزه‌يشت و وه‌يه‌يش شماره‌ى تويشبوين ره‌سيه 2913 كه‌س، له‌ليان 112 حاڵه‌ت مردن و 1903 حاڵه‌تيش خاسه‌وبوين و 898 حاڵه‌تيش له‌ژير چه‌وديرى پزيشكى.
