سێ حاڵەت مردن وە کۆڕۆنا لە پارێزگایل عراقی

شەفەق نیوز/ کۆمەڵەی فیقهی عراقی ئەرا ئەهل سوننە وجەماعە، ئمڕوو جومعە، پرسەو سەرەخوەشی نا ئەرا کۆچ دویایی پیاو ئاینی عومەر فازڵ سویدی، ئیمام مزگەفت ( نەجیب) لە ناوچەی سڵێخ لە بەغداد پایتەخت، دویای تووشهاتنی وە ڤایڕۆس کۆڕۆنا.
کۆمەڵەگە لە بەیاننامەیگ ئمڕوو وت؛ رەحمەتی لە خاوەن زانست و ودەعوەتەیل ناسریاگ بوی، خوەی فیدا کرد و ژیانی تەرخان کرد ئەرا خزمەت ئیسلام، لە دەعوەت ورینمایی و ئیمامی و خەتیبی لە مزگەفت حاج زەیدان لە ناوچەی تۆپچی، ئیجا لە مزگەفت نەجیب لە ناوچەی سڵێخ لە بەغداد.
بەیاننامەگە دووپاتکرد ک سویدی دویای تووشهاتنی وەڤایڕۆسەگە مالئاوایی یەکجاری کرد.
هەر لەو وەختە، ئەندامەیل زانکۆی بابیل لەماموستا وفەرمانبەر پرسەو سەرەخوەشی کردن لە م.د قاسم حەسەن ئەرنائوتی، ماموستای کۆلێژ زانستەگان، بەش کیمیا، دویای تووشهاتنی وە ڤایڕۆس کۆڕۆنا.
وەزارەت تەندروسی و ژینگەی عراق، روژ پەنجشەممە، تۆمارکردن ١٢٦١ تووشهاتن و ٣٥٤ خاسەوبوی، و ٣١ مردگ وە ڤایڕۆس کۆڕۆنا لە ماوەی ٢٤ ساعەت لە گشت عراق راگەیان.
سەرچەوەیگ پزشکی لە پارێزگای دیالە خەوەردا لە تۆماکردن یەک مردگ وە ڤایڕۆس کۆڕۆنا، ک بویە دوویەم حاڵەت مردن لە روژ جومعە.
سەرچەوەگە ئەرا ئاژانس شەفەق نیوز وت؛ یەکیگ لە تووشهاتگەیل لەوەر خراوبوین تەندروسیەگەی ئمڕوو مرد، ودیاری کرد ک هاووڵاتیە مردیەگە خەڵک ناوچەی حدێد ه‌ له‌ قەزای خاڵس.
وتیش؛ ئامارە کۆتاییەگە ئەرا مردگەیل و تووشهاتگەیل هیمان ئاشکرا نەکریاگە لە پارێزگاگە، وچەوڕی هەڵوێستە کۆتاییەگه‌ن له‌ ئاینده‌ .
جی باسە ک پارێزگای دیالە تا ئیسە ٢٥٧ تووشهاتن وە ڤایڕۆس کۆڕۆنا تۆمار کردگە، ١٨ لەلیان مردگە، و٩٢ خاسەوبویە.