سودانی وە سەردانیگ ئاشکرا نەکریاگ رەسێدە ئوردن

شەفەق نیوز/ محمد شیاع سودانی سەرۆک وەزیرەیل عراق، شەوەکی ئمڕوو، رەسیە عەمان پایتەخت ئوردن، لە سەردانیگ کە وەرجەیە ئاشکرا نەکریاس.

ئاژانس خەوەری فەرمی ئوردن "بەترا" وت: جەعفەر حەسان سەرۆک وەزیرەیل وڵاتەگەی، پیشوازی لە هاوتای عراقیی کرد، کە سەردانیگ فەرمی ئەرا شانشین کەێد.

هەرلیوا، نویسنگەی راگەیانن سودانی لە بەیاننامەیگ وت: سودانی لە عەمان پایتەخت چەوی کەفتە شا عەبدوڵای سانی کوڕ حسێن، وەبی باسکردنیگ زیاتر.

ئی سەردان ناکاوەیە وەلایەن سودانی لە سای رویداوەیل زویوەزوی لە ناوچەگە تیەێد، وەتایبەت دویای چەن رووژیگ لە رمیان رژیم ئەسەد وەدەس باڵە چەکدارەیل ئۆپۆزسیۆن تیەێد.