سودانی فەرمان دەێد نفووس کوردەیل فەیلی لە لیست بیگانە باێدە ناو عراقی
پەرلەمانتار حسێن مەردان ئەرا ئاژانس شەفەق نیوز وت: داوایگ خستیەسە وەردەس محمد شیاع سودانی سەرۆک وەزیرەیل تا نفووس کوردەیل فەیلی لە بیگانە بارێدە ناو نفووس عراقیەیل، چوینکە رژیم سەدام نفووسیان سڕیەو و وە هاوڵاتی نا عراقی و لایەنگر ئیرانی دادەیانە قەڵەم، و ئی زانیاریە راس نییە و ئەوە جەنگ سیاسی بوی لەبانیان.
دیاری کرد ک دویای ساڵ ٢٠٢٣ سڕەوکردن لەبان نفووسیان لاوریا و رەگەزنامە وەپیان دریا باوجی هەر لەناو نفوس بیگانە مەنن، و لەڕاسیەو خوەیان عراقیین وفرەیان رەگەزنامەی عوسمانی دیرن.
مەردان وتیش: دویای داواکردنەگە، محمد شیاع سودانی سەرۆک وەزیرەیل فەرمان دادە وەزیر ناوخۆ تا نفووس فەیلی بخریەێدە ناو نفووس عراقیەیل.
جی باسە ک رژیم وەرین وە سەرپەرشتیاری سەدام حسێن تا ماوەی سێ ساڵ هەزاران گەنج لە کوردەیل فەیلی وەرەو شوین نادیاریگ سەرنقوم کرد، و هیمان بیسەروشوینن، و مەزەنە هەس لەناو زیندان کوشیانە یا زنیوەچاڵ کریانە.
رژیم بەعس لە کۆتایی هەفتاگان و سەرەتای هەشتاگان لە سەدەی گوزەشتە دەسکردە هەڵمەت گەورەیگ ئەرا بارکردن کوردەیل فەیلی، و سەنین ڕەگەزنامەی عراقی لەلیان، و دەسناین وەبان ماڵ و داراییان وە دەسپیچگ ئەوە ک گوایە هاوڵاتیی ئیرانیین.
دادگای باڵای نەهیشنن تاوان، لە ساڵ ٢٠١٠ بڕیاری لە باوەت تاوانەیل بارکردن و سەرنقومکردن و دەسناین وەبان مافەیل کورد فەیلی دەرکرد، و وەتاوان جینۆساید دادەی قەڵەم.
