سهروك مسر ئامادهیی وڵاتهگهێ نیشاندا ئهڕا پڕچهككردن سوپاێ عراق
![سهروك مسر ئامادهیی وڵاتهگهێ نیشاندا ئهڕا پڕچهككردن سوپاێ عراق](https://media.shafaq.com/media/archive/files/Archive.jpg)
وهگورهێ بهیاننامهێگ نوێسینگهێ ئهیاد عهلاوی ك كوپیێگێ ئهڕا (شهفهق نیوز) كل كریاگه ، قسهگان سیسی له دیدار ئمڕو له عهمان پایتهخت ئوردون ، وهل جێگر سهروك كومار عراق ئهیاد عهلاوی كریاگه.
بهیاننامهگه ئاماژه وهیهیش كردگه عهلاوی "ئمڕو" له پهراوێز بهشداری كردن له كار كوڕبهندی ئابووری جههانی له باوهت خوهرههڵات ناوڕاس و ئهفریقیا ك له عهمان ساز كریاگه ، چهوێ كهفتگهسه عهبدولفهتاح سیسی سهروك كومار و سامح شوكری وهزیر كاروبار خارجیهێ مسر.
بهیاننامهگه باس ئهوهیش كردگه له دیدارهگهێ عهلاوی و سیسی ، دویایین گوڕانكاری ناوچهگه وهتایبهت جهنگ دژه ترور لهیهكهو دریاگه.
ههردولا له بان زهرورهت یهكخستن ڕزهیل هێزهیل دژه داعش و شكست داین تروریستهیل تهئكید كردنه ، و له بان یهیش ڕێكهفتنه ك ههردولا دیدارێگترله قاهره ساز بكهن.
عهلاوی له سهروك سیسی وهخاتر ههڵویستهیل نهتهوهیی وهتایبهت ههڵویست قاهره له وهراوهر تروریزم سوپاسگوزاری كردگه ، و له بان یهیش تهئكید كردنه ك جهنگ ئیسه ، جهنگ میانهڕهوی له دژ توندڕهوهیله ، یهیش نیاز وهئهوه دێرێ ك عهرهبهیل موسڵمان ئستراتیجی هاوبهشێگ داشتون له وهراوهر تروریزم.
وهگورهێ بهیاننامهگه ، سهروك سیسی ، ئامادهیی وڵاتهگهێ نیشانداس ئهڕا پشتگیری كردن عراق و سوپاگهێ چ له بوار مهشق و چ له بوارهیل پڕ چهك كردن و داین زانیاری ههواڵگری.