سامانە ئاوییەیلە پلانیگ ئەرا پاکەوکردن ئەڵوەن دانەێد
شەفەق نیوز/ فەرمانگەی سامانە ئاوییەیلە لە خانەقین، ئمڕوو یەکشەممە، راگەیان ئامادەکردن پلانیگ ئەرا پاکەوکردن چەم ئەڵوەن لە سەرەتای مانگ ئایندە، لەلایەن وەڕێوبەرایەتی پڕۆژەیل ئاویاری سەروە سامانە ئاوییەیلەی دیالە.
موئەیەد شاکر وەڕێوبەر فەرمانەگەگە ئەرا ئاژانس شەفەق نیوز وت: فەرمانگەی پڕۆژەیل ئاویاری وپاکەوکردن ئەوەسا لە یەک تەمووز ئایندە دەسکەێدە هەڵمەت پاکەوکردن چەم ئەڵوەن وەدریژی ٣ کێلومەتر لەناو قەزای خانەقین وە ئامێرەیل گەپیگ ئەرا پاکەوکردنی لە گژوگیا وزیایکردن جوولەی ئاوەگە، وهەمیش ئەرا جوانکردن سیمای شاە خانەقین.
شاکر دیاری کرد ک هەڵمەتەگە وەهەماهەنگی فەرمانگەی سامانە ئاوییەیلە لە خانەقین دەس وەپیکەێد، وپلانەگە خوازێد ریگرەیل نوای ئاوەگە لاوەێد.
دەربارەی ئەمار ئاوەگە لە بەنداو ئەڵوەن، شاکر دووپات کرد ک ئەمار ئیسەی لە ٣١ مەلیۆن مەتر شەشپاڵو زیاترە و هیچ داوەزینیگ لەلی نیە لەوەر پاڵپشتیکردن چەم ئەڵوەن وە مەرەقەزکردن ئاو لە چەم سیروان وەهەماهەنگی وەرد حکومەت هەرێم کوردستان.
هەر لیوا، وەڕێوبەر سامانە ئاوییەیلە باس هەڵمەتیگ پلەیی کرد ئەرا کەنین بیرەیلیگ لە خانەقین و ئامادەکردن ١٤ بیر ئەرا پاڵپشتی سامانە ئاوییەیلە لە دیالە و نواگردن قەیران ئاو.
