١٥ ساڵ زیندانی لەبان بەریتانییگ وە توومەت قاچاخکردن ئاسەواری
شەفەق نیوز/ دادگای کەرخ، ئمڕوو دووشەممە، فەرمان ١٥ ساڵ زیندانی لەبان بەریتانییگ دەرکرد، و بیگوناحی لەبان کەسیگ ئەڵمانی، لە توومەت قاچاخکردن پارچەیل ئاسەواری وەرەو دەیشت وڵاتەگە.
هەردوگ توومەتبار، جیمس فیتۆن زانای جیۆلۆجیای بەریتانی ٦٦ ساڵان، و فولکار ووڵدمان پزشک دەرۊنی ئەڵمانی ٦٠ ساڵان، لە ٦ ئادار لەناو گرووپیگ گەشتوگوزاری بوین، لە فڕۆکەخانەی بەغداد لە ١٠ی ئادار دەسگیر کریان، هەنای ١٢ پارچەی ئاسەواری لەلایان پەیا کریا.
لە یەکەم دانیشتن دادوەری، دادوەر وە توومەتبارەیل وت: وەگورەی مادەی ٤١ لە یاسای کەلەپوور و ئاسەواری عراق سزا دریەن، ک ئەو مادە رەسێدە وەسێدارەدان، لەبان هەرکەس وەزانستن چشتیگ ئاسەواری یا دەسکردیە وە دەرکردنی ئەرا دەیشت عراق.
ووڵدمان ئەڵمانی ک دوو پارچەی ئاسەواری لەناو جانتاگەی پەیا کریا، وت: ئاگا لەو پارچەیلە نەیرم، و ئەو دوو پارچە نەوردمە، وتیش: فیتۆن خستیەسەی لای، وهەمیش وت: هویچ نشانەیگ ئەرا قەیەغەی بردن ئەو پارچەیلە نەویە.
وتیش: هەنای فیتۆن ئەو پارچەیلە خستە لای من، نامەی ناو کیسەیگ وەشیوەی ئاشکرا و تەقەلای نەیامە بشارمەی، و تەگبیر بوی دووارە بیەمەی فیتۆن.
١٠ پارچەی ئاسەواری لەلای ئەو توومەتبارەگە پەیا کریا، ک لە دوو شوین ئاسەواری لە پارێزگای زیقار لە سەردەم شارستانی سۆمەری بریایە.
فیتۆن لە وەردەم دادوەر وت: نەزانستمە بردن ئەو پارچەیلە نایاساییە، وتیش: ئەوەگ سەرسامم کرد ک بەشیگ لە شوینەیل هوشداری و پاسەوان و تەیمان داشتیە، وبەشیگ واز بویە.
وتیش: فرەی ئەو پارچەیلە فرە بویچگ بوینە.
