سەرۆک هەرێم کوردستان دوو بانگواز ئەرا عراقیەگان و لایەنە سیاسییەگان ئاڕاستە کەێد
شەفەق نیوز/ سەرۆک هەرێم کوردستان، ئمڕوو یەکشەممە، پەیوەندیە سیاسیەگان لە عراق دویای جەنگ دژوە داعش دانا ک وەئاست تەما نەمان، و دوو بانگواز ئەرا عراقیەگان و گشت لایەنە سیاسییەگان ئاڕاستە کرد.
نێچیرڤان بارزانی لە وتاریگ لە رسوومەیل رووژ شەهید ک تایبەتە وە ساڵیاد کۆچکردن محمد باقر حەکیم، ک ئمڕوو لە هەولێر ئەنجام دریا، و پەیامنێر ئاژانس شەفەق نیوز ئامادەی بوی وت: ئمڕوو ساڵیاد شەهیدەیل عراق و کوردستان گردمانەو کەێد، و لەناوایان شەهید میحڕاب محمد باقر حەکیم، و وتیش: ئاساییە ک ئمڕوو ئی ئاهەنگە لەیرا ئەنجام بیەیمن ئەرا یادکردنەوەی دەور ئی بنەماڵە لە بتەوکردن پەیوەندیەگان لەناوبەینمان.
بارزانی ئاماژە کرد ک شەهید باقر حەکیم یەکیگ لە دامەزرێنەریل بزووتنەوەی وەرخودان ئیسلامی دژوە دیکتاتۆری بوی، و بڕوا وە پێکەوەژیان ئاشتەوایی لەناونی گشت گەلە عراقیەگان داشت، و دیاری کرد ک هەڵوێستەگەی پاڵپشت خوازینەیل گەل کورد بوی لە جیوەجیکردن داواکاریەگانی.
وتیش: ئەیە بوی ک هیشت هەر لە سەرۆک مەسعود بارزانی و محمد باقر حەکیم لە ساڵ ٢٠٠٢ لە کۆنگرەی ئۆپۆزسیۆن لەلەندەن بنەڕەت فیدڕالیەت لە عراق دانەن، و دیاری کرد ک ئمڕوویش پێشبینی ئی هەڵوێستە لە بنەماڵەی حەکیم و ماڵە شیعەگە لە بتەوکردن پەیوەندیەگان وەگەرد گەل کورد کەیمن.
وتیش: دویای جەنگەگەی داعش رەوشەگە ئاڵشت بوی و پەیوەندیەگان لە ئاست تەمامیلمان نیین، و هەمیش لەئاست تەمای بەشیگ لە برا شیعەگانیش نییە، و جەخت کرد ک بایەدە برا سونەگانیش لەی پەیوەندیەیلە بەشدار بکەیمن و جاریگ تر وەیکەو بنیشیمن.
و هەمیش جەخت کرد ک ئمڕوو و ئیمە ساڵیاد شەهیدان کەیمن، بایەدە سەر ئەرا دروسکردن پەیوەندییگ برایەتی وەهێزیگ بچەمنیمن، و ئیمە ئەرا ئەوە ئامادەیمن، و دووپات کرد ک ئیمە ئەرا گفتوگۆەیلیگ راسی ئامادەیمن.
و ئاماژە کرد؛ گشت لایەنەگان خاس زانن ک هیچ لایەنیگ وەبی ئەواکە توانای وەڕێوبەردن حکومڕانی عراق نەیرێد، و ئی ناکۆکیەیلە لە بەرژەوەنی هیچ لایەنیگ نییە.
ودیاری کرد ک وەپشتگووش خستن جارانی عراق ویران کرد، و جەخت کرد ک بایەدە هیچ لایەنیگ چەوەڕی لەناوبردن ئەو لایەنەگە نەکەێد، و هەمیش بایەدە کار ئەرا بیناکردن هەماهەنگی سیاسی ئەرا گەشەپێدان عراق بکریەێد.
و دیاری کرد ک بایەدە ئمڕوو وەرجە سوو گردەو بویمن و چارەسەر کرفتەیلمان بکەیمن، و چەوڕی ئەنجامەیل هەڵبژاردنەگان نەکەیمن، چوونکە گەل عراق گەلیگ هووشیارە و ئەوەسا پشتگیری ئەوە کەێد ک تەقەلای بیناکردن عراق دەێد، وتیش؛ لەیراوە بانگواز ئەرا گشت عراقیەگان ئاڕاستە کەم ک سەرکەفتنەگە هالە هەماهەنگی و کار هاوبەشی.
هەمیش وت: هەمیش بانگواز ئەرا گشت لایەنە سیاسییەگان ئاڕاستە کەیمن ئەرا خاسەوکردن ری کارە سیاسییەگە لە وڵاتەگە.
