سەرۆک کۆمار عراق مکیسیگ فەرمی ئەرا سەردان قەتەر وەرگرێد
شەفەق نیوز/ بەرهەم ساڵح سەرۆک کۆمار عراق، ئمڕوو چوارشەممە، پەیامیگ نووسیاگ لە شازادەی قەتەر تەمیم بن حەمەد ئال سانی ئەرا سەردان دۆحە وەرگرد، ودووپات لە شیوەیل چارەسەرکەردن سیاسی لە یەکلاکردنەوەی قەیرانەیل ناوچەگە کرد.
سەرۆکایەتی کۆمار لە بەیاننامەیگ رەسیە ئاژانس شەفەق نیوز وت: ساڵح لە کۆشک چەرمگ پێشوازی لە محمد بن عەبدولرەحمان ئال سانی جیگر سەرۆک وەزیران وەزیر دەرەوەی قەتەر کرد وە ئامادەبوین فوئاد حسێن وەزیر دەرەوە، و لە سەرەتایی چەوپێکەفتنەگە وەزیرەگە سڵاو شازادەی قەتەر ئەرا سەرۆک کۆمار ئاڕاستە کرد، و پەیامیگ نووسیاگ لەلایەن ئال سانی داگە دەسی، مکیسیگ فەرمی ئەرا سەردان قەتەر لەناوی بوی.
ساڵح سڵاو خوەی ئەرا شازادەی وڵاتەگە داگە دەس وەزیر قەتەری، هەمیش باس لە پەیوەندیە دووانیەکان لەناوبەین دوو وڵاتەگە کریا، و شیوەیل بتەوکردن بەرژەوەنیە هاوبەشەکان لەناوبەین دوو گەلەگە،و هەمیش گەشەیل رەوشە هەرێمی و ناودەوڵەتیە پەیوەندیدارەکان.
سەرۆک کۆمار دووپات کرد ک وەرپرسایەتی گەورایگ ئەرا وەپشتسەرنان قەیران و ئاڵووزیەکان هالە نوای دەوڵەتەیل ناوچەگە، ئەرا هەماهەنگکردن رەنجەیل وە پشتگیریکردن گفتوگۆ و هاندان وەرەو شیوەیل چارەسەرکەردن سیاسی لە یەکلاکردنەوەی گرفتەیل ناویان، و کارکردن ئەرا چەسپانن پاڵپشتیەیل ئارامی هەرێمی و نواگردن تیرۆر و هویر توندڕەوی، و پشتگیریکردن دەرفەتەیل هاوکاری ئابووری و بازرگانی و ئەوزەڵکردن.
وتیش؛ مسۆگەرکردن ئاسایش و ئارامی عراق و سەروەریی، جوور بنەمایگ سەرەکیە و بەرژەوەنی هاوبەشیگە ئەرا ئاسایش و ئارامی گشت ناوچەکە و بەرژەوەنی گەلەیلیان.
لەلای خوەییش وەزیرەگە دووپات لە پشتگیریکردن قەتەر کرد ئەرا کار هاوبەش وەگەرد لایەنە هەرێمی و ناودەوڵەتیەکان ئەرا مقەیەتیکردن ئاسایش و ئارامی ناوچەگە، و ئاماژە کرد لە پابەندبوین وڵاتەگەی لە پشتگیریکردن ئاسایش و ئارامی و سەروەری عراق، و بتەوکردن هاوکاری دووانی هاوبەش لە جووراجور چینەکان.
