سەرۆک کۆمار بیناکردن سوپای وەهێزیگ بەسیدە کۆنتڕۆڵکردن چەک بەڕەڵا
شەفەق نیوز/بەرهەم ساڵح سەرۆک کۆمار عراق، ئمڕوو چوارشەممە، دووپاتکرد ک بیناکردن سوپای وەهێزیگ وەرگری لە سەروەری عراق بکەێد، گریەبەسە وە کۆنتڕۆڵکردن چەک بەڕەڵا.
ساڵح لە بەیاننامەیگ رەسیە ئاژانس شەفەق پیرووزبایی وە سەد ساڵیاد دامەزرانن سوپای عراق کرد، و جەختکرد ک هێز و سام سوپا و گەشەپێدان چینە چەکدارەگانی خوەی هێز و سام ئەو دەوڵەتەسە ک مقەیەتی و خزمەت گەلەگەی کەێد.
و ئاماژە کرد لە گرنگی ئەوە ک سوپا بمینێد جوور دامەزراویگ ئەرا مقەیەتی سەروەری و نیشتمان نەگ بکەفێدە دەس ستەمگەری و دیکتاتۆریەت.
ساڵح دووپاتکرد ک ئەو سەرکەفتنەیلە ک لەبان تیرۆر ئەنجام دریان وەخاسی هاوکاری و پشتگردن چینەیل هێزە چەکدارەگان لە پێشمەرگە و حەشد شەعبی و هووزەگان، وەردەوامی تەقەلاگان خوازێد ئەرا بیناکردن سوپایگ نیشتمانی باوەڕ وە بنەما سەربازیەگەی و پەیامەگەی لە وەرگریکردن لە خاک و مقەیەتی سەروەری بکەێد، و ئەیە وەدەس نێکەفێد ئەرا چەک بەڕەڵا کۆنتڕۆڵ نەکریەێد، و چەک وەدەس دەوڵەت گیر ناێد، و پشتگردنەگان لەناوبەین پێکهاتەیل گەلەگە بتەوەو نەوود.
و ئاماژە کرد ک مقەیەتی ئەمن و ئارامی داوا وشایستەیگە هیچ وازهاوردن و خەمسەردی لەلی نییە، ک خوەی زەمینەی چگن وەرەو تەواوکردن ئەو شایستەگانە لە بیناکردن دەوڵەتیگ وەتوانا و خاوەن سەروەری تەواوی.
