سەرژمارییەگە ئارامی ئەرا بەغدا گلەو دەێد... و کارمەنەیلیگ ئەمنی ریگری لە رووژنامەنویسەیل کەن... وێنە
شەفەق نیوز/ شەوەکی ئمڕوو چوارشەممە، بەغدای پایتەخت عراق وە کەشیگ ئارام لە خەو هەڵسا لە یەکەم رووژ قەیەغەی هامشوو کە ئەرت ئەنجامدان سەرژماری دانیشتگەیل دیاریکریا، کە ساڵان فرەیگە لە وڵاتەگە نەکریاس.
کامیرای ئاژانس شەفەق نیوز وینەی ئەو دیمەنەیل کپ و ئارامە گرد لە جادەیل بەغدای، کە هاووەخت بوی وەگەرد ریکارەیل ئەمنی تون لەلایەن هیزە ئەمنییەیل ئەرا دڵنیابوین لە سەرژمارییگ بی گیچەڵ.
بەڵام پەیامنێر ئاژانس شەفەق نیوز بڵاو کرد کە لە چەن ناوچەیگ پایتەخت لەلایەن بەشیگ لە ئەندامەیل هیزە ئەمنییەیل کادیرەیل رووژنامەوانی تویش ئاستەنگی هاوردن.
وتیش: بەشیگ لە کارمەنەیل ئەمنی هاوکاری نەکردن، یەیش ریگر بوی لە جویلەی رووژنامەنویسەیل و وینەگردن لە ناوچەیلیگ جویر تەحریر، کەڕادە، و شۆرجە، لە ناوڕاس بەغدا.
پەیامنێرمان وتیش: بەشیگ لە ئەفسەرەیل وەو کارتە فەرمیەیلە کە لەلایەن دەسەی باڵای ئاسایش ئەرا سەرژماری گشتی یا دەسەڵات میدیا و پەیوەندییەیل دەرچگە رازی نەوین و وتن یە تەنیا بەڵگەنامەی "کاغەزیە" یەیش کەفتە روی رەخنەی ئەو رووژنامەنویسەیلە کە لەو بوارە کار کەن.
وەگورەی بەیاننامەیگ فەرمی کە لەلایان دەرچگە؛ دەسەی باڵای ئاسایش ئەرا سەرژماری گشتی دانیشتگەیل ئەرا ساڵ 2024 دووپات لەبان ئاسانکاری ئەرک و جویلەی گشت ئەو کەسەیلە کەێد کە مەوقەی قەیەغەی هامشوو ری وەپییان دریاس بگەردن و ئەوانەگ کارت هەڵگردنە کە لەلایەن دەسەی باڵا دەرچگە.
سەرژماری گشتی دانیشتگەیل عراق شەوەکی ئمڕوو چوارشەممە (20 تشرین یەکەم 2024) دەسوەپی کرد، یەیش وەگەرد ریکارەیل تون و تیژ، لەناویان قەبەغەی هامشوو لە گشت پارێزگایل ئەرا دڵنیابوین لە سەرکەفتن پڕۆسەگە.
