سەدان لە خیزانەیل لە ساڵیاد "کوشتار سپایکەر" روی وە تکریت کەن
شەفەق نیوز/ سەدان لە خیزانەیل لە پارێزگایل جیاجیای عراق، ئمڕوو شەممە، روی وەرەو شار تکریت لە پارێزگای سەڵاحەدین کردن، ئەرا هەشتەم ساڵیاد "کوشتار سپایکەر" ک ١٧٠٠ ئەندام لە هیزە ئەمنیەیلە وەدەس ریخریاگ داعش لە ساڵ ٢٠١٤ بوینە قوربانی.
عومور شنداح قایمقام تکریت ئەرا ئاژانس شەفەق نیوز وت: هیزە ئەمنیەیلە و فەرمانگەیل پەیوەندیدار پلانیگ خزمەتگوزاری و ئەمنی توکمە جیوەجی کردن، تا خیزانەیل لە کەسوکارەیل قوربانیەیل کوشتار سپایکەر بڕەسنە شوین تاوانەگە لە کۆشکەیک سەرۆکایەتی لە دەوروگەرد شار تکریت ناوەند پارێزگای سەڵاحەدین.
شنداح دیاری کرد ک پلانەگە دەرخستن شوین کوشتارەگە وەسیمایگ پووڕیاگ هاناوی وەگەرد دابینکردن گشت خوازینەیل خزمەتگوزاری و یاوەری هیزە ئەمنیەیلە وەگەرد خیزانەیل قوربانیەیل و ئاسانکردن رەدبوینیان ورەسینیان ئەرا شوین جیوەجیکردن ناشرینترین تاوان تیرۆری لەلایەن ریخریاگ داعش لە ساڵ ٢٠١٤ لەبان ئەندامەیل هیزە ئەمنیەیلە و کەسەیلیگ لەناو راهێنان، ودووپات لە سەرکەفتن پلان سەردان شوین سپایکەر کرد و گلەوخواردن فرەی سەردانکەرەیل ئەرا پارێزگایلیان وە ئاسانی وەبی هویچ گیچەڵیگ.
ریخریاگ داعش، لە مەوقەی داگیرکردن ناوچەگە، نزیکەی ٢٠٠٠ کەس گولەواران کرد، ک خوەنەوار کولێژ فڕۆکەوانی و ئەندامەیل ئەمنی لەناو کەمپ سپایکەر لە پارێزگای سەڵاحەدین بوین.
