زاملی: سەرۆک هەرێم کوردستان پیشوازی گەرمیگ لە هەڵوژاردەی عراق کردیە
زاملی لە قسەیلی ئەرا ئاژانس شەفەق نیوز وت: نێچیروان بارزانی سەرۆک هەرێم کوردستان پیشوازی گەرمیگ لە هەڵوژاردەی تووپان عراق کرد و رێز و سوپاس هەر تاکە کەسیگ کرد وەخاتر ئەو رەنج و تەقەلای بازیگەرەیلە و ئەو ئامانجە ک وەدەس هاوردن.
وتیش: سەرۆک هەرێم کوردستان وشەی رەنگینیگ داشتیە ک وت: ئیمە یەک نشتمانیمن، و ئەوەگ وەدەس سیاسەتمەدارەیل نەهات وەرزشکارەیل جیوەجیی کردن.
لەباوەت ئەو قسەیلە ک نریانە زوان ئومێد خۆشناو پارێزگار هەولێر لەباوەت مکیسنەکردن هەڵوژاردەگە ئەرا ریزگردنی لە هەولێر، زاملی وت: سوپاس ئەرا سەرۆکایەتی هەرێم کوردستان ماشین سەرۆکایەتی تایبەت ئەرا شاندەگە ئامادە کرد هەر لە فڕۆکەخانە ئەرا شوین نیشتەجیبوینیان، ئیجا وەگەرد وەرپرسەیل بردنەمان و لە نوایان برامان پارێزگار هەولێر ئەرا میوانی خانەدانیگ ئیجا روی کردیمنە فڕۆکەخانەگە و ئەویش وەگەردمان بویە، و دیاری کرد ک خۆشناو لە نوای پیشوازیکەرەیل و ماڵئاواییکەرەیل بوی، و فرە خانەدان بوێ و پیشوازی گەرمیگ لە شاندەگە کرد، و ئەوە چەسپنێد ک ئەو قسەیلە نریاسە زوانی راس نیین ک گوایە پیشوازی لە هەڵوژاردەگە نەکردگە.
زاملی سەرسامی خوەی لەو قسەیلە نشان دا ک نریاسە زوانی، ک شوین فراوانیگ گرد، دویای ئەوە چەومان کەفتە پیچەوانەی ئەوەگ میدیایل راگەیانن بڵاوی کردن، ک پیشوازیکردنەگە گەرم بوی وەلایەن وەرپرسەیل هەرێم کوردستان، وتیش: ئەگەر ئەوەگ لە میدیایل راگەیانن بڵاو کریا لە نیاز پارێزگار بویە، ئەرا ئی پیشوازیکردن رەنگینە لەلیمان کریا ک سوپاس هەرێم کوردستان لەبانی کەیمن.
زاملی وتیش: دووارەی سوپاس گەرمیان لە نێچیروان بارزانی سەرۆک هەرێم کوردستان و ئومێد خۆشناو پارێزگار هەولێر کەیمن لەبان ئەو خانەدانی و رێزگردنە ک نیشانی دان، و داوا لە میدیایل راگەیانن کردن ئاژاوە و ناکۆکی دروس نەکەن و هوشدار بوون لە بڵاوکردن خەوەر، وەتایبەت عراق یەکیگە وە عەرەب و و کوردی و گشت ئەو پیکاتەیلی.
