زەخمداری وە رویداو هاتوچو لەبان ری کەرکوک ـ تکریت

شەفەق نیوز/ سەرچەوەیگ ناوخوەیی لە پارێزگای کەرکوک، ئمڕوو سێشەممە، خەوەردا لە زەخمداری پەنج کەس لە یەک خێزان وە رویداویگ هاتوچو  لەبان ری کەرکوک ـ تکریت باشوور پارێزگاگە.

سەرچەوەگە ئەرا ئاژانس شەفەق نیوز ئاشکرایکرد، رویداوەگە لە ئەنجام لە یەکەوداین بارهەڵگریگ سزەمەنی وەگەرد ماشینیگ سالۆن رویدایە کە خێزانیگ لەناوی بوینە لەبان ری کەرکوک ـ تکریت لە ناحیەی رشاد، وتیش؛ لە ئەنجام رویداوەگە ژن و شوییگ وسێ لە  مناڵەیلیان زەخمداربوین کە خەڵک تکریتن، کە لەریگەی کەرکوک بوینە وەرەو هەرێم کوردستان.

سەرچەوەگە دیاریکرد، پۆلیس لە شوین رویداوەگە ئامادەبویە و زەخمدارەیلە ئەرا خەستەخانەی تایوەت خاڵس کلکریانە.