زیاتر لە ١٤٠ زەویلەرزە لەماوەی ٢٠٢٣ داس لە عراق

دەسەگە لە بەیاننامەیگ رەسیە ئاژانس شەفەق نیوز وت: بڕ گشتی ئەو زەویلەرزەیلە کە توومار کریانە لە تووڕ چەودیاری زەویلەرزەی عراق لە ماوەی ساڵی گوزەشتە 142 زەویلەرزە بوین، کە هازیان لەناوەین 1-5 پلە بویە، لە وەختیگ قویلایی فۆکەسیان رەسیەسە ناوەین 2 -34 کم.

وتیش؛ 115 زەویلەرزە لە ناوخوەی ئیران، 29  لە تورکیا، 16  لە سنوور عراق و ئیران، 8 لە سوریا، یەک زەویلەرزە لە سنوور عراق و تورکیا توومار کریاس.

دیاری کرد کە چالاکییە زەویلەرزەیل وە ئاشکرا لە ناوچەیل باکوور و باکوور خوەرهەڵات زیای بویە، وە تایبەتی لە نزیک سنوور عراق و ئیران لە ناوچەیل باشوور و باشوور خوەرهەڵات دەربەندیخان، قەزای کەلار لە سلێمانی، خانەقین و مەنەلی لە دیالە، قەزای بەدرە لە واست، و لە نەینەوا و کەرکوک و دهۆک و هەولێر، وەگەرد زەویلەرزەیگ لە ناوچەیل نزیک و شان عراق توومار کریانە، لەوانە تورکیا، ئیران و سوریا، بە هازیگ جیاواز لە ناوچەیگ تا ناوچەیگ ترەک.

دەسەگە وتیش: سلێمانی وە فرەترین رویداو زەویلەرزە کەفێدە نوای پارێزگایل، رەسیەسە 31 زەویلەرزە، ئیجا دیاله وە 23 زەویلەرزە، ئمجا نەینەوا  وە 20 زەویلەرزە ، میسان 14، کەرکوک 13، دهۆک 12، هەولێر 11، واست 9، بەسرە 4 ، و سەڵاحەدین 2. پارێزگایل بەغدا و ئەنبار و دیوانیە هەریەکەیان یەک زەویلەرزە توومار کردنە.

هەمیش وت: شمارەی ئەو ڕاپۆرتەیلە لە زەویلەرزە چرکەساتییەیل دەرچگە 43 ڕاپۆرت بویە، کە فرەیان لەلایەن هاووڵاتیەیل نزیک شوینەیل زەویلەرزەگڵ هەس وەپیان کردنە، و هویچ زیانیگ مرۆیی و ماددی توومار نەکریاس، وتیش: چالاکی زەویلەرزەیل ساڵ 2023 لە شمارەی هاوشیوەس تا سێ ساڵ گوزەشتە.