رێکخراویگ ناودەوڵەتی: عراقیەگان هانه زەحمەت لە نان سەنین
شەفەق نیوز/ دەسەی رزگارکردن ناودەوڵەتی، ک تایبەتە وە قەیرانە مرۆییەگان لە جهان، داواکرد لە دووقات کردن كوششه‌یل ئەرا نواگردن لە بڵاوبوین ڤایڕۆس کۆرۆنا لە عراق، دویای ئەوە ک وڵاتەگە زیایبوین ٦٠٠ لە سەدی وەخوەی دی لە ژمارەی تووشهاتگەیل لە مانگ حوزەیران.
وەزارەت تەندروسی عراقی، رووژ پەنجشەممە راگەیان لە تۆمارکردن ٢١٨٤ تووشهاتگ نوو و ١١٠ مردن، تا گشت تووشهاتنەگان لە عراق بەرزەوبوود ئەرا ٥٣ هەزار تووشهاتگ و دەور ٢١٠٠ مردگ.
عراق هالەناو سێ دەوڵەت عەرەبی ک بەرزترین مردن تۆمار کردنە، وەگورەی ئامار نووسینگەی خوەرهەڵات ناوڕاس لە رێکخراو تەندروسی جهانی.
دەسەی رزگارکردن ناودەوڵەتی لە بەیاننامەیگ ئاماژەدا؛ ک ژمارەی تووشهاتگە راسیەگە رەسیە ٥٣٧٠٨ کەس، لە یەکەم رووژ لە تەمووز، وئەویش بەرزەوبوینیگە لە ٦٨٦٨% لە ١ حوزەیران.
کریستین بیتری وەڕیەوبەر دەسەگە لە عراق وت: رێژەی بڵاوبوین ڤایڕۆسەگە فرە نیگەرانکەرە ، ئیمە زیاتر لە هەزار تووشهاتگ نوو لە روژیگ دوینیمن، و جاروەجار زیاتر لە دوو هەزار تووشهاتگ، و هویچ بەڵگەیگ ئەرا کەمەوبوین نیە.
رێکخراوە ناودەوڵەتیەگە وەگرد هاتنەوەی خۆپیشاندانەگان لە عراق وت: داوای كوشش فرەتر کەێد ئەرا ئەوە ک عراقیەگان بزانن چوون بیماریەگە بڵاو بوود و مقەیەتی خوەیان و ئەوەکان بکەن وشیوەیگ گونجیاگ، تا کۆنتڕۆڵ کردن رەوشەگە بتەو بوود، وەگوەرەی ماڵپەڕ حورەی ئەمریکی.
لە باوەت کاریگەری پەتاگە لەبان ئابووری، بیتری وت: مەردم کارەیلیان لەکیسیان چگ، و زەحمەت کیشن تا پویل بکەفێدە دەسیان ونان بسینن، ئەوان کەمتر خوەن و بنمایەیلیان خەرجکردن وچقیەنەسە ناو قەرز.
لێکۆڵینەوەیگ ك رێکخراوەگە ئەجامی دا لەبان ١٤٩١ کەس لە عراق، دەربارەی کاریگەری قەیران کۆرۆنا لەبان ئابوورییان، دیارخست ک ٨٧ لە سەد لەلیان کارەیلیان لەدەسیان چیە لەوەر قیەغەگە، و ٧٣ لە سەد وتن لە خواردن کەمەوکردن تا خه‌رجەگان کەمەو بوون، و ٨٦ لە سەدیان وتن خەریکە بنمایەیلیان خەرجکەن، و ٦١ لەسەد وتن ک چقیانەسە ناو قەرز.
رێکخراوەگە دووپاتکرد ک پێشکەشکردن دەسمیەتی ئەرا عراقیەگان چارەسەرکردن هەمیشەیی نیە، و دووپاتکرد لە گرنگی بتەوکردن هووشیاری لە کارە مقەیەتیەگان لە بیماریەگە، جوور دویرەوکەفتن کۆمەڵایەتی، و وەردەوامی لە دەسشوردن، و کەمکردن وەقەیداین ئەوکان، و کەرەنتین لەوەخت دیاربوین نیشانەیل بیماریەگە.
وەزارەت کار و باوەتە کۆمەڵایەتیەگان عراق، دووپاتکرد لە زیایبوین رێژەی هەژاری لە وڵاتەگە، لەوەر پەتای کۆڕۆنا و نائارامی نرخ نەفت.
عادل رەکابی وەزیر کار و باوەتە کۆمەڵایەتیەگان لە وتاریگ رۆژنامەوانی وت: دویای بڵاوبوین ڤایڕۆس کۆرۆنا لە گشت دەوڵەتەیل جهان، ک بویە هووکار داوه‌زین نرخ نەفت، وەخراوی هاتەو ئەرا زیایبوین رێژەی هەژاری لە وڵاتەگە، ك لە ٢٢ ئەرا ٣٤ لە سەد بەرزەوبوی.
رەکابی هەمیش وت: وەزارەتەگە هەوڵ دەێد ئەرا وەپشتسەرنان قەیرانەگە، لە ری هاوکاری وەگەرد لایەنە ناودەوڵەتیەگان، ئەرا پەیاکردن چارەسەریەل زوینە لە زیایبوین رێژەی هەژاری و بیکاری، هەمیش ئەو ریکارەیلە ک دەوڵەتەگە پێشکەشی کەێد ئەرا چینەیلیگ وەزارەتەگە چەودیرییان کەێد، لە ری دابەشکردن بیمە ئەرا هاووڵاتیەیل خاوەن داهات سنوردار ک زەرەدمەن بوین لە چەسپانن قیەغەی هاتووچگنە مقەیەتیەگە.
