رووژنامه‌يگ بريتانى: خوه‌ينيشانداين ده‌سڵات سياسيه‌يل له جه‌هان خه‌ێد و له‌ناونيانيش عراق
شه‌فه‌ق نيوز/ رووژنامه‌ى ئه‌ندبندنت بريتانى باوه‌تيگ رووژنامه‌نويس بورزو دراغى وه ناونيشان(خوه‌ينيشانداين ده‌سڵات نوخبه‌ى سياسى له جه‌هان خه‌ێد).
دراغى باس له‌وه كردگه وه‌رجه رووژه‌يليگ داوت كرياگه ئه‌را ئيواره‌خوانيگ وه بوونه‌ى وه‌سه‌رچگن 30 ساڵ له‌بان رميان ديوار به‌رلين، وه‌لێ وه‌ل رووژنامه‌يل تر تويش موفاجئه‌يگ بوينه له‌وه‌ر هه‌وه‌جه‌يان ئه‌را لێدوانيگ ئه‌منى زيايه وه‌بوونه‌ى خوه‌ينيشانداينه‌يليگ ك له به‌رلين ئه‌نجام گرت.
دراغى وت: ئمڕوو جه‌هان روێ له خوه‌ينيشانداين مه‌ده‌نى وه‌رده‌واميگ كردگه‌و ئه‌گه‌ريش ده‌سڵاته‌يل نوخبه‌ى گه‌ناته‌كار سياسى نه‌ڕميه‌ن له‌ئاست جه‌هان ئه‌وه له‌ى حاڵه‌ته ئه‌و خوه‌ينيشانداينه‌يله كزه‌و بوون.
ئى رووژنامه‌نويسه زياتر وت: سه‌ربار قه‌واره‌ى كاريگه‌رى له‌بان ئى نوخبه‌يله ك روێ وه‌ڕوێ فشار مه‌ردمى ئه‌دێ، وه‌لێ وه‌ل ئه‌وه‌يشا له عراق و ئيران و جه‌هان عه‌ره‌بى و فره‌نسا و سودان و تشيلى و هۆنگ كۆنگ و جه‌زاير ئه‌وه ده‌ركه‌فت ك ته‌نانه‌ت به‌رزه‌وكردن نرخ به‌نزينيش بويه‌سه هووكار كه‌فتنه‌وه‌ى ناڕه‌زايه‌تى فراوان وه‌تايبه‌ت له ئيران.
جى باسه، رووژنامه‌نويسه‌گه هه‌ميش وت: تائيسه‌يش هه‌مان نوخبه‌ى سياسى و سه‌ركرده‌ى سيستم شه‌راكه‌ت جه‌هانى له ده‌سڵات مه‌ندنه هه‌ر له له‌نده‌ن بگر تا به‌رلين و واشنتۆن، سه‌ربار ئه‌وه‌يش ك بايه‌سه له‌بانيان باج ئه‌و هه‌ڵه‌يله بيه‌ن ك ئه‌نجامى دانه، له‌وانه‌يش نه‌وين كه‌فائه‌ت و گه‌نده‌ڵى.
