رووژنامه‌يگ ئاشكراى ناوه‌يل تازه‌يگ كرد "بنياتنان" له‌شوون عه‌بدولمه‌هدى ئه‌خاده‌يانه روێ
شه‌فه‌ق نيوز/ هاوپه‌يمانى بنياتنان ك فشار جه‌ماوه‌رى فريه‌يگ هاته‌سه تويشى، بريار ئه‌وه دا ئه‌سعه‌د عيدانى كانديدى ئه‌را سه‌رۆكايه‌تى حكومه‌ت وه يه‌كجارى بكيشێده‌و.
له‌ى باوه‌ته‌و، سه‌ركرده‌يگ باڵا له هاوپه‌يمانيه‌گه ك نه‌تواسگه ناوى ئاشكرا بدێ، ئه‌را ئه‌لعه‌ره‌بى ئه‌لجديد ئه‌وه ده‌رخستگه ك له‌ماوه‌ى دو رووژ كانديدكردن عيدانى وه‌فه‌رمى ئه‌كيشنه‌و له‌وه‌ر ئه‌وه‌گ ناكووكى په‌يا بويه له كانديدكردنى و جموجويل ئه‌كريه‌يد وه‌ره‌و لاوردن به‌رهه‌م ساڵح سه‌رۆك كۆمار.
ئه‌و سه‌ركرده باس له‌وه‌يش كردگه ناوه‌يل تازه‌يگ ئه‌خريه‌نه روێ جوور كانديد تازه له‌شوون عادل عه‌بدولمه‌هدى ئه‌را پۆست سه‌رۆك وه‌زيره‌يل، له‌وانه‌يش فه‌ريق يه‌كه‌م روكن عه‌بدولغه‌نى ئه‌سه‌دى، ك رۆڵ وه‌رچه‌ويگ داشتگه له جه‌نگه‌يل ئازادكردن شاره‌يل عراق له‌ده‌س داعش.
باس له‌وه‌يش كردگه ناوه‌يل تر هه‌ن ك يه‌كيگيان دادوه‌ريگه له دياله، بيجگه ساڵح حه‌سناوى وه‌زير وه‌رين ته‌ندروسى و عيماد حسه‌ينى سه‌رۆك زاانكۆى به‌غدا، له هه‌مان وه‌خت يه‌يش ده‌رخستگه ك شه‌نس ئه‌سه‌دى ئه‌را وه‌رگرتنى له‌و باقى ناوه‌يل فريه‌تره.
