راپۆرتيگ ناوده‌وڵه‌تى ئاشكراى ناكووكيه‌يل سه‌ختيگ له‌ناو رزه‌يل حه‌شد شه‌عبى ئه‌كا
شه‌فه‌ق نيوز/ ماڵپه‌ڕ"جاست سيكورتى" ك تايبه‌ته وه كيشه‌يل ئاسايش نه‌ته‌وه‌يى و باره‌گاگه‌ى ها نيويۆرك، ئاگادار وڵاته‌يل يه‌كگرتگ كرد ئه‌را ده‌سكردن وه گامه‌يليگ له‌وه‌ر كووتاييهاوردن وه نفوز ئيرانى له ده‌سه‌ى حه‌شد شه‌عبى له عراق، له‌وانه‌يش زه‌مانه‌تكردن دامه‌زرانن كه‌سيگ فه‌رمى ك سه‌ر وه ته‌هران نه‌دێ له‌شوون ئه‌بو مه‌هدى موهه‌ندس.
ئه‌و ماڵپه‌ڕه باس له ناكووكيه‌يل سه‌ختيگ كرد ك وه‌ى دوياخره كه‌فته‌سه‌و له‌ناو ده‌زگايه‌يل حه‌شد شه‌عبى له‌باره‌ى ئاشكراكردن مسه‌له‌ى دامزرانن عه‌بدولعه‌زيز محێمداوى وه سه‌رۆك ئه‌را ئه‌ركان حه‌شد شه‌عبى له‌شوون موهه‌ندس ك له په‌لاماريگ ئه‌مريكى كوشيا وه‌ل قاسم سوله‌يمانى سه‌ركرده‌ى فه‌يله‌ق قودس ئيرانى له نزيك ته‌ياره‌خانه‌ى ناوده‌وڵه‌تى به‌غدا.
جى باسه، دامه‌زرانن محێمداوى(ئه‌بو فه‌ده‌ك) ك سه‌ر وه كه‌تيبه‌يل حزبوڵڵاى سه‌ر وه ئيرانه، بويه‌سه جى مشتومڕ لايه‌نه‌يل ته‌ر فريه‌يگ و هه‌ر وه‌و خاتريشه ماڵپه‌ڕه‌گه ئاگادارى ئه‌ياد وڵاته‌يل يه‌كگرتگ ئه‌را ئه‌وه‌گ جموجويل بكاو كار له‌بان هانداين حكومه‌ت تازه‌ى عراقى بكا تا ده‌سڵات ياسايى خوه‌ى باريده كار له‌بان هيزه‌يل حه‌شد شه‌عبى له‌وه‌ر دامه‌زرانن كه‌سيگ تر فه‌رمى ئه‌را پۆست جيگر سه‌رۆك ده‌سه‌ى حه‌شد شه‌عبى.
