ئیران: قائانی هەڕەشەی داگیرکردن هشکایی عراق نەیاگە
شەفەق نیوز/ کەناڵ "مەیادین" لوبنانی، ئمڕوو سێشەممە، لە زوان سەرچەوەیلیگ ئیرانی وت: ئیسماعیل قائانی فەرماندەی هیز قودس ئیرانی، لە سەردانەگەی بەغداد لەی دویاییە، هەڕەشەی پەلامار سەربازی هشکایی ئەرا لەناوبردن باڵەیل کورد ئیران ئۆپۆزسیۆن لەبان زەوی عراق نەیاگە.
سەرچەوەیل ئیرانی وتن: ژەنەڕاڵ قائانی لەی باوەتە وەرد وەرپرسەیل عراقی نەکردیە، و هەڕەشەی داگیرکردنیگ نە هشکایی نەیش جویریگتر لەبان باکوور عراق نەیاگە.
ئی قسەی سەرچەوەیل ئیرانی لەبان راپۆرتیگ لەلایەن رووژنامەی "فایننشاڵ تایمز" ئەمریکی هات، ک وت: ژەنەڕاڵ قائانی ئی هەڕەشەیلە لە سەردان دویایینی ئەرا بەغدا داگە.
راپۆرتەگەی "مەیادین" وت: باڵیۆز ئیرانی لەلای بەغداد کازم ئال سادق وت: ژەنەڕاڵ قائانی سەردان عراق کرد و چەوی کەفتە سێ سەرۆکایەتیی، و ئیران وەرد حکومەت فیدراڵی و دەسەڵاتەیل هەرێم کوردستان رێک کەفتن لەبان بڵاوکردن هیزەیل عراقی لەبان سنوور وەرد کوردستان.
وتیش: حکومەت عراق پلانیگ ئەرا بڵاولردن هیزەیل لەبان سنوور هەرلە ئیران و تورکیا دانا، و لە زوان ئاژانس "فارس" ئیرانی باس راپۆرتیگ کرد ک وتیە: باڵیۆز ئیرانی دووپات لە رەزامەنی حکومەت بەغداد لە داوای تەهران کردیە، ک کۆنترۆڵ تەواویی بخەێدە بان سنوور هەردوگ وڵاتەگە.
