رافده‌ين هووكاره‌يل دوياكه‌فتن مووچه‌ى كارمه‌نده‌يل له ده‌زگايه‌يليان ئاشكرا كرد
شه‌فه‌ق نيوز/ بانگ رافده‌ين داوا له بڕيگ ده‌زگايه‌يل ده‌وڵه‌ت كرد پابه‌ند بوون وه واده‌ى دياريكرياێ ئه‌را كلكردن و پڕه‌وكردن هساوه‌يل داراييان له‌وه‌ر دابه‌شكردنى له‌بان كارمه‌نده‌يليان و دويا نه‌كه‌فن له كلكردنى.
له‌ى باوه‌ته‌و، نويسينگه‌ى ره‌سانن بانكه‌گه له به‌ياننامه‌يگ وت: بانكه‌گه لايه‌نيگ جيوه‌جيكاره له مه‌سه‌له‌ى دابه‌شكردن مووچه‌و هه‌ر ده‌زگايگ هساو دارايى خوه‌ى ره‌وانه بكا ئه‌وه له‌ى حاڵه‌ته بانكه‌گه ده‌س ئه‌كاده دابه‌شكردنى وه‌گووره‌ى سيستمه‌يل تازه‌ى ئه‌لكترۆنى.
به‌ياننامه‌گه هه‌ميش وت: بڕيگ له ده‌زگايه‌يل هه‌ن كلكردن هساوه‌يل داراييان دويا ئه‌خه‌ن ئه‌را چه‌ن رووژيگ و جارجاريگيش هه‌ڵه دروس ئه‌دێ له ليست تايبه‌ت وه بڕه دارايى كارمه‌نده‌يليان و بانكه‌گه‌يش ناچار ئه‌دێ دوباره كليه‌و بكا ئه‌را راسه‌وكردن و هه‌ر وه‌و خاتريشه دابه‌شكردن مووچه‌ى كارمه‌نده‌يليان دويا ئه‌كه‌فێد.
