ئۆپراسیۆنەیل بەغداد ١٠ توومەتبار دەسگیر کەێد سێ تیرۆریست هاناویان
شەفەق نیوز/ فەرماندەیی ئۆپراسیۆنەیل بەغداد، ئمڕوو یەکشەممە، دەسگیرکردن دە توومەتبار راگەیان، سێ تیرۆریست هاناویان، ودەسنا وەبان چەکەیل بیدەنگ لەلایان.
فەرماندەیەگە لە بەیاننامیگ رەسیە ئاژانس شەفەق نیوز وت: لە جیوەجیکردن فەرمانەیل دەسگیرکردن دادوەری و ئەرکەیل مینەکردن و وەشکین، وخەسەوکردن تەقەلایل هەواڵگری، وە هەماهەنگی و وەشوینکەفتن وەگەرد بەش هەواڵگری وئاسایش فەرماندەیی ئۆپراسیۆنەیل بەغداد، دوو توومەتبار دەسگیر کریان، وەگورەی مادەی ١/٤ تیرۆر، دویای رەوانگەی هەسییان لەناوچەی عامریە لەلایەن هیزیگ لە لیوای پیادەی ٢٧ و دەسنریا بان دوو تفەنگ وەگەرد یەک دەوانچە ویەک ئامێر بیدەنگی و بومبیگ لکیای لەلایان.
وتیش: فەوجیگ لە فریاکەفتن یانزەی بەغداد، توومەتباریگ داواکریاگ وە مادەی ٤ تیرۆر دەسگیر کرد، وتیش: خاڵ ئەبو غرێب سێ توومەتبار وە کوشتن لە ناوچەیل خوەرئاوای بەغداد دەسگیر کرد.
فەرماندەیی ئۆپراسیۆنەیل بەغداد وتیش: هیزیگ لە لیوای ٢٤ لە فیرقەی هەڤدە وە بەشداریکردن مەفرەزەیگ لە دژە تاوان بەغداد/ دۆرە، سێ توومەتبار وەگورەی مادەیل یاسایی جیاجیا دەسگیر کرد، لە ماوچەی بوعێسە، وگەڕەک لوخابەرات لە کەرت کەرخ، وتیش: توومەتبارەیل وەگەرد چشتەیلیان دریانە دەس لایەنەیل پەیوەندیدار.
