دیالە.. تویشهاتگەیل کۆرۆنا گرده‌و كه‌ید
شەفەق نیوز/ فەرمانگەی تەندروسی دیالە ئمڕوو چوارشەممە، دوو به‌ش تازه ئەرا کەرەنتین تەندروسی کردەو، دویای زیایبووین تویشهاتن وەڤایرٶس کۆڕۆنا لە پارێزگاگە.
خزەیر عەزاوی قسەکەر راگەیانن وەناو فەرمانگەگە ئەرا ئاژانس شەفەق نیوز وت: تەندروسی دیالە وهەماهەنگی وەل شانەی قەیرانەگە دوو به‌ش ئەرا کەرەنتین تەندروسی کردەو. دیاریش کرد ک یەکەم به‌ش ها لە هۆڵ سوزمان لە خەسەخانەی بەعقوبە، ودویەمەگە هالە وەڕیەبەرایەتی گەنجه‌یل و وەرزش، وەگەرد هەوڵدان ئەرا ئاڵشتکردن بەشە ناوخوەگان زانکۆی دایالە ک دەور ٤٦٧ ژوور هاناوی تا بکریەێدە کومەڵەگی کەرەنتین تەندروسی ئەگەر تویشهاتن کۆڕۆنا بەرزترەوبوی.
عەزاوی ئاماژەدا ک به‌ش کەرەنتین تەندروسی ئیسە لە بەعقوبە پڕەو بویه، دویای ئەوە ک ژمارەی تویشهاتگەیل لەژیر چارەسەری ٦٥ كه‌س رەدکرد. دیالە ١٦٦ تویشهاتگ وە ڤایڕۆس کۆڕۆنا تۆمارکرد، ١٥ لەلیان مردگە و ٦٦ خاسەوبوینه.
