دوياى ده‌سوه‌پيكردنه‌وه‌ى "جه‌نگ سزانن".. دياله "چه‌ك سه‌ركه‌فتگتر" ئه‌يه‌رێده كار
شه‌فه‌ق نيوز/ هه‌مام ته‌ميمى ئه‌ندام له‌بان پاريزگاى دياله، داوا له ده‌سڵاته‌يل ئه‌منى كرد پشت وه ته‌ياره‌يل بى ته‌ياره‌وان و كاميرايه‌يل تازه‌ى ئه‌منى بووه‌سن ئه‌را مقه‌يه‌تيكردن له تاوه‌ره‌يل وزه و مقه‌يه‌تيكردن له خه‌له‌يل گه‌نم له جه‌نگ سزانن ك له‌لايه‌ن ريكخرياگ تيرۆرستى داعشه‌و له پاريزگاگه ده‌س وه‌پى كرياگه، ئه‌ويش وه"چه‌ك سه‌ركه‌فتگ تر" تاريف كرد.
ته‌ميمى ئه‌را شه‌فه‌ق نيوز وت: مه‌سه‌له‌ى په‌لامارداين تاوه‌ره‌يل جيوازكه‌ر وزه‌ى كاره‌با له ئيرانه‌و ئه‌را دياله پلانيگه ئه‌را شيوانن دقه‌تكردن ده‌زگايه‌يل ئه‌منى و رخه‌وبردن جاده وه دروسكردن ئاژاوه‌و مه‌راميش له‌لى شيوانن بارودوخ ئه‌منيه له پاريزگاگه.
جى باسه، ته‌ميمى هه‌ميش وت: بژارده‌ى پشتبه‌سانن وه ته‌كنۆلۆجيا و ته‌ياره‌يل بى ته‌ياره‌وان و كاميرايه‌يل تازه‌ى ليزه‌رى چه‌ك سه‌ركه‌فتگتره ئه‌را مقه‌يه‌تى له تاوه‌ره‌يل جيوازكه‌ر وزه‌ى كاره‌با و روێ وه‌ڕوێ بوينه‌وه‌ى سزانن ده‌خڵ و دان له‌لايه‌ن ريكخرياگ تيرۆريستى داعشه‌و له دياله دوياى سزانن روێ وه‌ر فراوانيگ له گه‌نم له باكوور ناحيه‌ى عزێم ك ئه‌كه‌فێده دويرى 60كم له باكوور دياله.
