دوو لیوای سەربازی عراقی ئەرا قایمکردن سنوور سوریا.. سیناریۆی ٢٠١٤ دووارە نیەودەو
شەفەق نیوز/ نایف شمەری نوینەر لە پارێزگای نەینەوا، ئمڕوو یەکشەممە، دووپات لە رەسین پاڵپشتی سەربازی ئەرا کەرت خوەرئاوای نەینەوا کرد ئەرا قایمکردن ئاسایش لەبان سنوور وەگەرد سوریا، لە وەختیگ پسپۆریگ ستراتیژی وت: رویداوەیل ناو سوریا رخدارییگ راستەخۆ لەبان رەوش ناو عراق نەیرێد.
شمەری ئەرا ئاژانس شەفەق نیوز وت: پاڵپشتیکردن سەربازی رەسیە قەزای شنگال و کەرت خوەرئاوای نەینەوا ئەرا قایمکردن سنوورەگە، و دیاری کرد کە دوو لیوا رەسیە یەمەن لە سوپای عراق و دویەم لە پولیس فیدڕاڵی.
شمەری دووپات کرد کە سیناریۆی ٢٠١٤ دی گلەو نیەخوەێدر و هویچ لایەنیگ بیگانە پا وەناو زەوی عراق نیەنەێد، و دیاری کرد کە رویداوەیل ٢٠١٤ لەوەر سنوورە وازەیل و بەدیکردن ژیروەژیر و سەرکردەیل گەندەڵ بوی کە تەنیا هووڵ گردەوکردن پویل و چەسپانن باج بوی، و ئمڕوو ئەو چشتەیلە وەتەواوی نەمەنن.
شمەری وتیش: خەڵک نەینەوا وەیەک رز وەگەرد هیزەیل ئەمنی وسیەن، و شانوەشانیان تا دویاترین هەناسە وسیەن ئەگەر عراق، خودا نەخوازێد، بکەفێدە هەر بەدییگ.
وتیش: گشت نشانەیل دەسنیشان ئامادەیی خەڵک نەینەوا کەن لە هووز و پیر و گەنجەیل، ئەرا وەرگریکردن لە گشت خاک عراق، نەک تەنیا نەینەوا، وەرانوەر هەر تەقەلای پەلاماریگ ئەوەیش دویای ئەو زیانە کە لە ستەم و تیرۆر داعش دین.
وەرجەیە، سەرچەوەیگ ئەمنی ئەرا ئاژانس شەفەق نیوز وت: پاڵپشتیکردن سەربازی لە لیوای ١٠١ لە فیرقەی قەڵغانی ٢٥ رەسیە شنگال ئەرا قایمکردن سنوور عراق وەرد سوریا، ئەوەیش وەگەرد سەختەوبوین جەنگەیل لە حەلەب.
هەرلیوا، فیراس ئەلیاس پسپۆڕ ستراتیژی و مامووستای زانستەیل سیاسی لە زانکۆی موسڵ وت: رویداوەیل ناو سوریا رخدارییگ راستەخۆ لەبان رەوش ناو عراق نەیرێد.
ئەلیاس ئەرا ئاژانس شەفەق نیوز وت: ئەو خەوەرەیلە کە باس رخدارییگ لە روی عراق کەن لە ئەنجام رویداوەیل ناو سوریا خوازن ڕای گشتییگ دروس بکەن ئەرا مەرامەیلیگ تایبەت، وەلێ فرەی ئی قسەیلە راس نییە، بەڵکم لە شوین ئەژندایلیگ ناسیاس هەڵوەسیەن.
ئەلیاس وتیش: بایەسە جیاوازی ناوەین رویداوەیل حەلەب ز ئەو ناوچەیل سوریا بفامیمن و ئەوەگ لەبان سنوور عراق و سوریا بوود، هەرچەن پەیوەندی ناوەینیان نییە، وەلێ گرنگە بویشیمن رخداریە گەورەگە کەفێدە هەڕەشەی بان سنوور.
دووپاتیش کرد کە ئۆپۆزسیۆن سوریا هەڕەشەی عراق وەشیوەی راستەخۆ نیەێد، چوینکە جەنگی هاوەگەرد رژیم سوریار ز کاریگ وە دەوڵەت عراقی نەیرێد، و هویچ بنەمایگ نییە بیلێد جەنەگە بڕەسێدە ناو عراق.
ئەلیاس وتیش: نیگەرانی کەفێدە لای ئەو هەڕەشەیلە لەلایەن داعش ئەگەر رەوش سوریا بکەێدە دەرفەت ئەرا خوەی، وەتایبەت لە ناوچەیل سنووری، وەلێ ریخریایەگە توانای ئەوە لەناو عراق نەیرێدر لەوەر قایمکردن شوینەیل وەلایەن هیزەیل ئەمنی.
وتیش: تورکیا لەی کارە لە سوریا بوود فرەترین قانجازکەرە، کە مەزەنە کریەێد وەردەوام بوود لە ئۆپراسیۆنەیل سەربازیی لە باکوور سوریا، دویای کۆنترۆڵکردن حەلەب، کە هاتێ پلانەیلی ئەرا فراوانکردن ئۆپراسیۆنەیلی لە باکوور عراق قایم بکەێد.
ئەلیاس وتیش؛ ئیران فرە زەردمەنە لەی رویداوەیلە لە سوریا، کە ساڵ ٢٠٢٣ هانێ ساڵ نەهامتیە ئەرا ئیران، چوینکە لە چەن بەرەیگەو زوور هاتە یانی.
وتیش: ئیران ئەوەسا تەقەلا دەێد کەسی لە عراق زیاتر بەن بکەێد، چوینکە نزیکترین شوین جوگرافیاییە ئەرای، و نزیکترە ئەرا ئاسایش نەتەوەیی.
ئەلیاس لە کۆتایی وت: ئیمەیل عراقی، بایەسە خاس بزانیمن کە گیچەڵەگە سوریە و مار ناو سوریا خوەیە، و بایەسە سنوور خوەمان قایم بکەیمن، و خوەمان نەخیمتە ناو جەنگەگە، و نەویمنە بەشیگ لە هویچ پڕۆژەیگ هەرێمی یا ناودەوڵەتی، بەرژەوەنی نیشتمانی لە گشتی گرنگترە، ئەراوە بایەسە هویر وە بەرژەوەنی خوەمان بکەیمن وەرجە بەرژەوەنی ئەوەکان.
