دویای هەشت رووژ لە خوەیکوشتنی.. پەیاکردن تەرم گەنجیگ لەناو ئاو شەتلعەرەب
2025-01-18T12:04:22+00:00
شەفەق نیوز/ سەرچەوەیگ لە پارێزگای بەسرە، ئمڕوو شەممە، خەوەردا لە پەیاکردن تەرم گەنجیگ لەناو ئاو شەتلعەرەب، دویای 8 رووژ لە خوەیکوشتنی لەبان پیەڵ ئیتالی و مینەکردنی.
سەرچەوەگە ئەرا ئاژانس شەفەق نیوز وت: گەنجیگ لەداڵگبوی ساڵ 2008 خوەی لە بان پیەڵ ئیتالی خستە ناو ئاو شەتلعەرەب، کە کامیرایل چەودیاریکردن ئاشکرای کردن، دویای ئەو کە کەسوکارەیلی ئاگاداری توومار کردن کە یە سێ رووژە دیاری نییە.سەرچەوەگە وتیش: تیمەیل مەلەوانی وەدرویژایی ئی ماوە لە وەخت دیارنەمانی وەردەوام بوین لە مینەکردن، تا ئمڕوو تەرمەگەی پەیا کردن، و ئەرا پزشک دادوەری بریا.
