دویای شەویگ وارانی.. پارچەیل کۆنکرێتی رمیەنە بان پاسەیلیگ بویچگ لە دیالە

شەفەق نیوز/ سەرچەوەیگ ئەمنی لە پارێزگای دیالە، ئمڕوو شەممە، خەوەردا ک پارچەیل کۆنکرێتی کریانەسە تەیمانە لە دەورگرد بنکەی پولیس، لەوەر وارانە رفتەگەی ئمشەو رمیانە، و پاسیگ بویچگ داغان کردنە.

سەرچەوەگە ئەرا ئاژانس شەفەق نیوز وت: پاسیگ مارکەی "کیا" لەنزیک بنکەی پولیس لە بەعقوبە وسیایە، وە تەواوی داغان بوی، دویای ئەوە ک پارچەیل کۆنکرێتی رمیانە بانی.

سەرچەوەگە وتیش" ئەو واران رفتە ژیر ئەو پارچەیل کۆنکرێتیە خویسانیە و نەرم کردیە، و هیشت بڕمیەنە بان ئەو ماشینە ک وە تەواوی داغانی کردن، وتیش؛ لێکۆڵینەوەی ئەمنی لە رویداوەگە واز کریا.