دویای سێ ساڵ لە قتی.. واران جادەیل بەغداد نقوم کەێد

شەفەق نیوز/ بەغداد پایتەخت و پارێزگای دیالە، و ناوچەیلیگ لەناوڕاس عراق، ئمڕوو شەممە، وارانەیل رفتیگ وەخوەیان دین، فرەی جادەیل ناو شارەیل نقوم کرد.

یە یەکەم جارە واران لەناویان بوارێد، جویر مزگانییگ ئەرا دەسکردن وەرز زمسان، و هەمیش یە یەکەمین جارە لە ساڵ ٢٠١٩ تا ئیسە لە پارێزگاگە بوارێد.

وینە و پارچە ڤیدیۆ نشان نقومبوین جادەیل گرنگیگ لە بەغداد پایتەخت و دیالە دان، دویای یەکەمین واران، ک بەدی و نەوین خزمەتگوزاری هاوردە یاد.

کرتەیلیگ نشان دان ک ئاو وارانەگە چوودە ناو خەسەخانەی نوعمان حکومەتی لەناوچەی ئەعزەمیەی بەغداد.

هەرلیوا، سادق عەتیە پسپۆڕ کەشناسی لەبان فەیسبووک وت: بەغداد و دیالە هانە ژیر گەردەلویل گرمەهڕ سەختیگ ک هیمان وەردەوامە، وتیش: خەریکە روی وەرەو باکوور خوەرهەڵات وڵاتەگەیش کەێد.