ده‌سپاكى له‌باره‌ى هه‌واڵيگ شه‌فه‌ق نيوز تايبه‌ت وه نه‌ينه‌وا ئاشكراكردنيگ دا
شه‌فه‌ق نيوز/ ده‌سه‌ى ده‌سپاكى ناوه‌ندى باس له شيوازه‌يل پرووسه‌ى ده‌سگيركردنيگ كرد ك له وه‌ڕيه‌وبه‌رايه‌تى په‌روه‌رده‌ى پاريزگاى نه‌ينه‌وا ئه‌نجامى دا، ئاماژه وه ده‌سگيركردن هه‌ريه‌ك له وه‌ڕيه‌وبه‌ر گشى وه‌ڕيه‌وبه‌رايه‌تيه‌گه وه وه‌كاله‌ت و وه‌ڕيه‌وبه‌ره‌يل به‌ش ژمێريارى و ياسايى كرد له‌تى.
ده‌زگاى په‌يجورى له ده‌سه‌گه، له قسه‌يلى له‌و پرووسه ك ئه‌نجامى دا وه‌گووره‌ى ياداشت دادوه‌رى، ئاماژه وه جيوازبوين تيميگ له وه‌ڕيه‌به‌رايه‌تى په‌يجورى نه‌ينه‌وا ئه‌را وه‌ڕيه‌وبه‌رايه‌تى په‌روه‌رده‌ى پاريزگاگه كرد و وت: ئه‌و تيمه تويه‌نستنه وه‌ڕيه‌وبه‌ر گشتى په‌روه‌رده‌ى نه‌ينه‌وا وه وه‌كاله‌ت ده‌سگير بكه‌ن، بيجگه دو تومه‌تبار تر له وه‌ڕيه‌وبه‌رايه‌تيه‌گه ك پيكهاتنه له وه‌ڕيه‌وبه‌ره‌يل به‌ش ژمێريارى و ياسايى، ئه‌ويش له‌وه‌ر سه‌رپيچييان له بڕيار سه‌رۆكايه‌تى ئه‌نجومه‌ن وه‌زيره‌يل و بانك ناوه‌ندى تايبه‌ت وه جيگيركردن مووچه‌ى گشت كارمه‌نده‌يل له ده‌زگايه‌يل ده‌وڵه‌ت له‌ڕێ وه‌رده‌وامى دابه‌شكردن مووچه‌يليان وه‌ده‌س و له‌ڕێ رككه‌فتن وه‌ل بانكيگ ئه‌هل و بڕين بڕيگ پويل له مووچه‌ى كارمه‌نده‌يل.
ئاشكراكردنه‌گه‌يش له‌وه‌ختيگ بوێ ك سه‌رچه‌وه‌يگ ئه‌منى ئاشكراى كرد ك هيزيگ له ده‌سپاكى وه‌ڕيه‌وبه‌ر گشتى په‌روه‌رده‌ى پاريزگاى نه‌ينه‌وا و وه‌رپرسه‌يل تر وه تومه‌ت گه‌نده‌ڵى دارايى ده‌سگير كردگه.
له‌و باوه‌تيشه‌و سه‌رچه‌وه‌گه ئه‌را شه‌فه‌ق نيوز وت: هيزيگ له ده‌سپاكى وه‌ڕيه‌وبه‌ر گشتى په‌روه‌رده‌ى نه‌ينه‌وا و وه‌ڕيه‌وبه‌ره‌يل ژمێريارى و ياسايى له په‌روه‌رده‌ى نه‌ينه‌وا وه تومه‌ت گه‌نده‌ڵى ده‌سگير كردگه.
