دراوردن سوخان مامر لە پشت دڵ بیماریگ عراقی.. وینە
شەفەق نیوز/ فەرمانگەی تەندروسی نەجەف، ئمڕوو سێشەممە، ئەنجامدان نەشتەرگەرییگ راگەیان ئەرا دراوردن سوخان مامر لە پشت دڵ بیماریگ ٧٠ ساڵان، ئەوەیش لە شار پزشکی سەدر.
فەرمانگەیە لە بەیاننامەیگ لە زوان دکتۆر بەها عەبدولڕەزاق محمد عەلی پسپۆڕ نەشتەرگەری دڵ ک رەسیە ئاژانس شەفەق نیوز وت: بیمارەگە زیان لە سەختی قویتداین وەگەرد ژان سینە و تەنگەهەناسی و تەو داشت، ودویای وەشکین مفراس دەرکەفت ک چشتیگ قوڕگی کونا کردیە ولە پشت دڵی وسیاگە.
دیاری کرد ک بڕیار دریا نەشتەرگەری وازکردن سینە ئەرای بکریەێد تا ئەو چشتە دراریەێد، ک دویای ئەوە دیار دا ک سوخان مامرە ک بیمارەگە وەرجەیە قویتی داگە، و لەناوڕاس سینەی لەپشت دڵی دراوریا.
دکتۆر محمد عەلی وتیش: پینەی قوڕگی کریا، و ئەو شوینە لەنزیک دڵی پاکەو کریا، وتیش: ئی نەشتەرگەریە فرە مەترسیدارە، ک ریژەی مردنه رەسێدە ٤٥% و مەنین چشتیگ لە ناوڕاس سینە ئەرا زیاتر لە یەک رووژ بوودە تویشهاتن وە بەکتریا و ژەهراوی خوین.
وتیش: نەشتەرگەریەگە وە سەرکەفتن رەسیە ئەنجام، و ئیسە تەندروسی بیمارەگە خاسە، وسوپاس تیم نەشتەرگەری کرد.
