دەووارە وازکردن پیەڵ "موعەلەق" لە نوای ناوچەی خەزرا لە بەغداد
2022-08-03T06:36:41+00:00
شەفەق نیوز/ دەسەڵاتەیل ئەمنی عراق، ئمڕوو چوارشەممە، وازکردن پیەڵ موعەلەق لەنوای جویلەی هامشوو وەرەو ناوچەی خەزرا لەناوڕاس بەغداد راگەیانن.
فەرماندەیی ئۆپراسیۆنەیل بەغداد و فیرقەی تایبەت فەرمان وازکردن پیەڵەگە لەنوای جویلەی ماشینەیل دان وەرەو ناوچەی خەزرا.
رووژ دووشەممە، هیزە ئەمنیەیلە وەگەرد خوەینشاندان لایەنگرەیل چوارچیوەی هەماهەنگی وەرانوەر مانگگردن سەدریەیل لەناو ناوچەی خەزرا ئەو پیەڵە بەسان.
