دەسگیرکردن چوار لە گەورە بازرگانەیل هوشبەری و پویچەڵکردن تەقەلای دزەکردن دەیان پاکستانی وەرەو ناو عراق
ئاژانس هەواڵگری و لێکۆڵینەوەی فیدڕاڵی لە وەزارەت ناوخۆ وت: وەڕی مەفرەزەیل وەڕیەوبەرایەتی گشتی هوشبەری توەنستن دوو بازرگان هوشبەری دەسگیر بکەن، یەک و نیم کێلوگرام لە مادەی ماریگوانا وەپیان بویە و دەسنریا بان ١١ قلیان ئەلیکترۆنی مادەی ماریگوانای شل لەناوی بویە، وەگەرد کەرەستەیل وەکارهاوردنی لە بەغداد، و ریکارەیل یاسایی وەگەردیان جیوەجی کریا.
هەرلیوا، هەواڵگری سەربازی خەوەردا لە دەسگیرکردن دووان لە گەورەترین بازرگانەیل هوشبەری لە نەینەوا، لە بنەمای زانیاری هەواڵگری هویرد ئەرا بەش هەواڵگری و ئاسایش فیرقەی چواردە وەگەرد هەواڵگری و هیزیگ لە لیوای پەنجا و مەفرەزەیگ لە بەش هوشبەری قەیارە کوڵەی توکمەیگ لە خاڵ شوهەدا ئەرایان نریا، و دوو بازرگان هوشبەری دەسگیر کریان وەگورەی مادەی ٢٨ لە یاسای هوشبەری.
بەیاننامەگە وتیش: پەنج کیسە لە مادەی کریستال هوشبەر وەپیان گریا، ک مەزەنە کریەێد لە شەش کێلوگرام زیاتر بوود، و دریانە دەس لایەنەیل پەیوەندیدار.
لەلاییگتر، فەرماندەی هیزەیل سنوور لە بەیاننامەیگ وت: لیوای سنوور دەهەم توەنستە٥٨ کەس دەسگیر بکەێد، لە ڕەگەزنامەی بیگانە، خوازینە وەشیوەیگ نایاسایی لە سنوورەگە رەد بوون.
وتیش: توومەتبارەیل دریانە دەس لایەنەیل پەیوەندیدار.
هەرلیوا، سەرچەوەیگ ئەمنی وەرپرس ئەرا ئاژانس شەفەق نیوز وت: ئی کەسەیلە ک دەسگیر کریانە ڕەگەزنامەی پاکستانی وەپیان بویە، لە سنوور ئیران هاتنەسە ناو عراق وەشیوەیگ نا یاسایی تا مینەی کار بکەن.
