دەسگیرکردن فەرمانبەریگ لە تووڕ راگەیانن عراق هووشبەر و چەک وەپی بۊە

شەفەق نیوز/ سەرچەوەیگ ئەمنی، ئمڕوو سێشەممە، خەوەردا ک هێزیگ ئەمنی فەرمانبەریگ لە تووڕ راگەیانن عراقی لە باکوور بەغداد پایتەخت دەسگیر کرد، بڕیگ هووشبەری و چەک لەلای بۊ.

سەرچەوەگە ئەرا ئاژانس شەفەق نیوز وت: وە چەودێریکردن هۊرد و زانیارەیلیگ هەواڵگری، هێزیگ ئەمنی چگە ناو ماڵیگ لە ناوچەی ئوم نەجم لە شار شوعلە، و یەکیگ لە فەرمانبەرەیل تووڕ راگەیانن عراقی دەسگیر کرد.  

و دیاری کرد هێزە ئەمنیەگە دەسنابان ٢٤٠ گرام لە مادەی کریستال و ١٩٠ حەپ هووشبەر،.وەگەرد دو دەوانچە و نارنجەیگ و چەن چشتیگ تر لەلای بۊ.