دەسەی دەرەوەی پەرلەمان پەیامیگ دەربارەی هەڕەشەی سەربازی تورکیا لە عراق ئاڕاستەی کازمی کەێد
شەفەق نیوز/ دەسەی پەیوەندەیە دەیشتیەگان لە پەرلەمان عراق، ئمڕوو شەممە، هووشداری لە ئۆپراسیۆنیگ سەربازی لەلایەن تورکیا لە قەزای شەنگال کرد، ک ئەوەسا دەر ئەرا دەسوەردانەیلیگ دەیشتەکی لە عراق واز کەێد.
موختار موسەوەی ئەندام دەسەگە ئەرا ئاژانس شەفەق نیوز وت: هەر ئۆپراسیۆنیگ لەلایەن هەر هێزیگ بیگانە لەناو خاک عراق، خوەی پێشێلکردن سەروەری عراقە و هەڕەشەی ئەمن و ئارامییە، و وتیش؛ بایەدە حکومەت موستەفا کازمی نوای هەر ئۆپراسیۆنیگ سەربازی لە هەر هێزیگ لەناو عراق بگرێد.
و دیاری کرد ک بایەد بوی موستەفا کازمی سەرۆک وەزیران عراق لە سەردانەگەی ئەرا تورکیا وەرجە چەن رووژیگ، سنووریگ ئەرا پێشێلکارەگان تورکیا بنیاتاد، لەجیای ئەوەگ سەردانەگەی کردە پرۆتۆکۆلی وەبی ئەنجامەیل دیاریگ.
موسەوەی وتیش؛ هەر ئۆپراسیۆنیگ سەربازی تورکی لەناو خاک عراق، بوودە خاوەن ئەنجامەیل خراویگ لەبان ڕەوشەگە لە ئایندەی نزیک یا دویر، و ئەوەسا دەر ئەرا دەسوەردانەیلیگ دەیشتەکی تر واز کەێد.
رەجەب تەیب ئۆردوگان سەرۆک تورکیا، رووژ جمعە، راگەیان ک شایەت هێزەیل وڵاتەگەی لە هەر وەختیگ دەس بکەێدە ئۆپراسیۆنیگ سەربازی دژوە پەکەکە لە قەزای شەنگال.
