دەسەڵاتەیل ئەمنی عراق لێکولینەوە لە پەلامارەیل وەبان بێجی و کەرکوک واز کەن
شەفەق نيوز- بەغداد/هەولێر/كەركوك/سەڵاحەدین
سەرچەوەیگ ئاگادار، ئمڕوو سێشەممە، خەوەردا کە دەسەڵاتەیل ئەمنی عراق لێکولینەوە لەو پەلامارەیلە واز کردن کە رەسینە فڕوکەخانەی ناودەوڵەتی کەرکوک و پاڵاوگەی بێجی لە پارێزگای سەڵاحەدین.
سەرچەوەگە ئەرا ئاژانس شەفەق نیوز وت: فەرمان لە دەسەڵاتەیل باڵای دەزگایەیل ئەمنی هات وە دروسکردن دەسەیگ پایەبەرز ئەرا وازکردن لێکۆڵینەوە ئەرا رەسین وە بندروس رویداوەگەی دویەشەو لە کەرکوک و بێجی.
سەرچەوەگە دیاری کرد کە دەسەگە هەمیش ئەرک لێکۆڵینەوە لە سەرچەوە و شوین وەشیان ئەو گولەیل و درۆنەیلە وەرەو فڕوکەخانەی کەرکوک و پاڵاوگەی بێجی هەڵگرێد.
شەوەکی زوی ئمڕوو، سەرچەوەیگ خەوەردا کە وەرگری عراقی درۆنیگ نەناسیای لە دەورگرد پاڵاوگەی بێجی لە پارێزگای سەڵاحەدین خستە خوارەو.
دویەشەو لە وەخت دیریگ، فڕوکەخانەی ناودەوڵەتی کەرکوک کەفتە وەر پەلاماریگ وە گولە، کە هیشت دەسەڵاتەیل ئامادەباشی ئەمنی لە چەن دامەزراوەیگ گرنگ لە باکووری وڵات بەرزەو بکەن.
شەفەق ئەمروو سێشەممە، رێبوار تەها پارێزگار کەرکوک، دروسکردن دەسەیگ راگەیان ئەرا رەسین وە بندروس ئەو پەلامار مووشەکیە کە کەرکوک کردە ئامانج، وتیش؛ دویای کوشتن بڕیگ لە ئەندامەیل داعش هات.
وتیش: زەخمداری کەسیگ لە ئەنجام ئەو پەلامارە توومار نەکریا، و تەنیا زەرەدەیل دارایی کەمیگ بوی، دووپاتیش کرد کە ئەو پەلامارە دویای ئەوە هات کە هیزەیل ئەمنی توەنستن شمارەیگ لە ئەندامەیل داعش لە دەورگرد شارەگە بکوشن.
دووپات کرد کە دەسەیگ لێکۆڵینەوە ئەوەسا ئاشکرای بندروس رویداوەگە کەێد و ئەو لایەنە کە لە پشتی بویە.
