دیاردەی "سوپەر نینۆ" نیمچە دورگەی عەرەبی گردیە...عراق زیاترین کاریگەری وارین رفتیگ و وەرجەوەختی هابانی
2023-09-19T08:26:49+00:00
شەفەق نیوز/ کەشناس عەلی جابر زیادی، ئمڕوو سێشەممە، مەزەنەکرد وەرز واران وارین ئمساڵ وەشیوەی وەرجەوەختی دەسوەپی کەێد، چوینکە نیمچە دورگەی عەرەبی کەفێدە وەر دیاردەی "سوپەر نینۆ".
زیادی وە ئاژانس شەفەق نیوز وت، دیاردەی "سوپەر نینۆ" ئمساڵ فرە قایمتر بوود لە چەو دوو دەیەی گوزەشتە، ئاشکەرایکرد، وە مدوو گەرمەوبوین و بەرزی پلەی گەرمی ئاو زەریا و دەریای عەرەب و کاریگەریەیلتر دروسبوود.
دیاریکرد "شیوەی واران وارین ئی زمسانە یەکیگ بوود لە خاسترین وەرزەیل بیس ساڵ گوزەشتە شارە جیاوازەیل وڵاتەگە واران وەخوەیان دوینن بڕیگ شوین رەسێدە بان رێژەگە".
زیادی وتیش " گەشبینییگ هەس لە وەرجەوەختی وەرزەگە کە واران لە نیمەی مانگ ئایندە تەشرین یەکەم دەسوەپی کەێد، وارینەگە لە کۆتایی مانگەگە و لە تەشرین دویەم لە عراق زیایەوکەێد".
