خوەیکوشتن گەنجیگ و پویچەڵکردن دوو تەقەلای خوەیکوشتن لە سێ پارێزگا

شەفەق نیوز/  سەرچەوەیگ ئەمنی لە عراق، ئمڕوو چوارشەممە، خەوەردا لە خوەیکوشتن گەنجیگ، و پویچەڵکردن دو تەقەلایتر لە رویداوەیل جیا لە ماوەی چەن ساعەت گوزەشتە لە بەغدای پایتەخت و پارێزگای نەینەوا و واست. 

سەرچەوە ئەمنیەگە وە ئاژانس شەفەق نیوز خەوەردا " گەنج 20 ساڵانیگ خوەی کوشتیە لەری هەڵواسین خوەی لە ماڵیان لە ناوچەی مەوفەقیە لە پارێزگای واست، هوکارەگەی تا ئیسە دیار نییە". 

پۆلیس فیدرالی ژنیگ 38 ساڵان لە تەقەلای خوەیکوشتن لە ری خستنەخوار لە بەرزی پیەڵ ئەئمەت لە شار کازمیە باکوور بەغدای پایتەخت قورتار کرد. 

پۆلیس لە بەیاننامی کوڵیگ ک وە ئاژانس شەفەق نیوز رەسیە وت، " ئەو ژنە  تویشبوی بیماری دەرونیە، مەفرەزەیل ئاسایش فەوج سێیەم لیوای هەشتەم توەنستنە نواگیری لەلی بکەن و رادەس دەزگایەیل تایبەت کردنە". 

سەرچەوە ئەمنیەگە وە ئاژانس شەفەق نیوز وت، " پۆلیس دەریاوانی گەنجیگ قوورتارکرد ک خوەی لەبان پیەڵ کۆنەی موسڵ خستیەسە خوار لەوەر گیچەڵ وەگەرد خێزانەگەی". 

وتیش، " بەلەمەیل پۆلیس دەریاوانی  لە کۆتا چرکەیل رەسینەس وەپی وەرجە ئەوەگ نوقوم بوود"، وتیش: " تەمەنی ها لە سیەگان و خاوەن ژن و یەک کورە".